July 20, 2017
He hootaka whakawhanake take iwi taketake
He hootaka whakawhanake take iwi taketake
Ko te rakahinongatanga o te iwi Maori i roto i te rangai matauranga te kaupapa korero a Janine Kapa-Blair raua ko Taakuta Dianne Ruwhiu ki te Hui Matauranga Iwi Taketake ka tu ki Toronto, Kaanata a tera wiki. Kei te Kura Takiura o Otakou raua e mahi ana, a, na raua te kaupapa 'Te Parikiriki o te Kii' i timata, he kaupapa e whakangungu ana i nga tauira ki nga ahuatanga o te whakatuu pakihi Maori.
He aha te anga whakamua mo taatou?
Kia kite rongoa mo te aputa nui i waenganui i te Pakeha me te Maori, kia kite ara e rite ai te mana, katahi ano pea ka pai te whakakoretanga o nga turu torangapu Maori. Koira taa Marama Fox, hoa toihau o te RTM. No te wiki nei i puta ai te karanga a Winston Peters kia pootihia e te motu te oranga tonutanga o enei turu nei. Hei taa Fox, ina te tini o nga hua kua puta i nga turu torangapu Maori i roto i nga tau, a, mena kaore aua turu, kua kore tatou i whai i te aha.
Ko Ihowa te tiimatatanga me te whakamutunga o ngaa mea katoa
Kaore i te pai kia raweke tatou, kia taanoanoa ranei tatou i te mana o te atua. Koira taa Heketerangi Broadhurst kuia o Waikato-Tainui ki te kaupapa nui o te wa, ara, ae ranei e pai ana kia whakamatea te tangata e manawakiore ana.
He tautoko kei reira mo Tauranga Moana
E akiaki ana a Ngati Wai i te Karauna kia kimihia he ara e tau ai taa ratou tono raupatu, kua hia nei tau e taarewa ana. Ko tetahi o nga raru kua maarari te tono raupatu a Ngati Wai, ko raua tahi ko Pare Hauraki e whawhai ana mo te mana o te moutere o Aotea. Nei ra a Ahorangi Pou Temara o te Roopu Whakamana.
Ko Reipa ka pupuru tonu i ngaa tūru māori
Hei taa te kaiarahi i a Reipa a Andrew Little, mena ka Kawanatanga a Reipa, ka toituu tonu nga turu torangapu Maori. Hei taa te mangai mo te Tai Tonga a Rino Tirikatene o Reipa, kei te kokiri pire ia i tenei wa nei e pumau ai nga turu Maori mo ake tonu atu. Heoi, hei taa Dover Samuels, kaitoorangapuu oo mua ma Reipaa, akene pea e tika ana taa Winston Peters, ara, kua tae ki te wa e matapakihia ai te anamata o nga turu Maori.
He mangai reo hou ki tenei whenua
Ka ako te katoa o nga manene ki tenei whenua i te reo Maori i raro i te kaupapa manene a te RTM. Koira taa te hoa toihau o te RTM, taa Marama Fox. Hei taana, ka ata noho nga manene hou ki te ako i nga korero mo Te Tiriti of Waitangi me etahi ahuatanga o te reo Maori.
Copyright © 2017, UMA Broadcasting Ltd: www.waateanews.com