July 31, 2017
Te Kura Nui o Waipareira
Te Kura Nui o Waipareira
Kua whakarewahia e Te Whanau o Waipareira Trust, he moheni rangahau e whakatairanga ana i te angitu o ana kaupapa, o ana rautaki me ana ratonga paapori ki te iwi Maori. Hei taa te hoa aroturuki o te moheni rangahau nei, ara, o Te Kura Nui o Waipareira, a Ahorangi Meihana Durie, ma te moheni nei ka rongo, ka kite te katoa i nga korero mo nga wheako o nga whanau kei nga taone nui e noho ana, otira, e oke ana, me nga kaupapa kua whakatuuria e Waipareira hei awhina i a ratou.
Pukapuka hou Point of Order Mr Speaker
Kua puta he pukapuka hou, ko te ingoa ko 'Point of Order Mr Speaker'Na Takuta Selwyn Katene raua ko te kaitorangapu o mua mo te RTM, a Rahui Katene te pukapuka nei i tuhi. Ko tona kaupapa, he titiro ki nga kaitorangapu Maori e waru, ara, ko Metiria Turei, Shane Jones, Paula Bennett, Tau Henare, Hekia Parata, Hone Harawira, Te Ururoa Flavell me Nanaia Mahuta, me nga pukenga kaiarahi, pukenga pu korero, o tena, o tena ratou.
Heke a Little i tana turanga
Tera te whakapae, ka heke iho a Andrew Little i te turanga kaiarahi i a Reipa i roto i te hui a te kahui rangatira o Reipa i te ra nei. Hei taa Taakuta Bryce Edwards, matanga torangapu, e tino kino ana te tatauranga mo Reipa i tenei wa, ara, e rua tekau ma oorau noa iho o te tautoko, a, e taarake ana te kite atu i te pouritanga me te ruuhaatanga o Little. Hei taa Edwards, e waru wiki noa iho e toe ana ki te kowhiringa pooti, no reira, koinei te wa e hapai ai a Reipa i a Jacinda Adern ki te turanga kaiarahi, mei kore e huri te tai.
Piki te tautoko o Nga Kakariki
E whakaae ana a Marama Davidson, kaitono i te turu o Tamaki mo Nga Kakariki, na te whaakitanga a Metiria Turei i tana tinihanga i te punaha penihana i nga wa o mua, kua piki te tautoko ki a ratou o Nga Kakariki i roto i nga tatauranga o te wa. E ai ki nga tatauranga a Colmar Brunton, kei Nga Kakariki te tekau ma rima oorau o te tautoko, a, hei taa Davidson, te ahua nei kua whai hua te whaakitanga a Turei, a, kaore e kore kua whakawhiti etahi o nga kaipooti i a Reipa ki Nga Kakariki.
Rotorua hei reo rua
Kei te tautokohia te mootini kia tuu a Rotorua hei whaitua reo rua ookawa tuatahi o te motu. I pootihia tenei kaupapa i roto i te hui a te Kaunihera o Rotorua i tera wiki, a, katoa katoa nga kaikaunihera i whakaae. Hei taa te Toihau o te Poari o Te Tatau o Te Arawa, a Te Taru White, e tika ana pea kia arahi a Rotorua i tenei kaupapa o te whaitua reo rua, i te mea, e ahua reo rua ke ana i tenei wa, heoi ano, ma te Kawanatanga me te Kaunihera te reo ruatanga e whakaookawa.
Copyright © 2017, UMA Broadcasting Ltd: www.waateanews.com