April 06, 2017
He raruraru nui te Myrtle Rust
He raruraru nui te Myrtle Rust
Me tautoko te iwi Maori i nga kaupapa ka whakatuuria hei patu i te ngaangara Myrtle Rust. Koira taa Kevin Prime o Te Papa Atawhai. Kua kitea taua ngangara i te moutere o Raoul, kei waenganui i a Tonga me Aotearoa nei, engari, e ai ki nga korero, mama noa iho kia kawea mai e te hau, taua mate kai rakau taketake ki konei.
Ngati Whatua Orakei Urupa
Kua utaina atu e Ngati Whatua Orakei he rahui ki runga i te whanga o Okahu, whai muri iho i te waipuketanga o to ratou urupa. Hei taa Sharon Hawke, mangai mo te iwi, ka tahuri ano ratou ki te Kaunihera ki te whakatika i tenei raru e rite tonu nei te kitea i te wa o te ua marangai.
Ko te reo te ito
Whakamiha ana nga matanga reo Maori i te whakarewatanga mai o te kawe reo hou a te umanga Wah-way (Huawei), ko te reo Maori tetahi o nga kowhiringa kei runga. Nei raa Stacey Morrison me etahi whakamahuki mo te waea atamai tino hou o te wa.
Kei te anga whakamua a Ngati Tuwharetoa
Kua pooti nga uri o Ngati Tuwharetoa kia waitohua taa ratou whakataunga tiriti. Kotahi rau, waru tekau miriona taara te uara o te whakataunga, ko nga ngahere o te puku o te ika kei roto. Whitu tekau ma rua oorau o nga uri i pooti tautoko kia tuu Te Kotahitanga o Ngati Tuwharetoa ki te whakatutuki i te whakataunga. Hei taa Te Ariki o Tuwharetoa, a Ta Tumu Te Heuheu, he mea nui tenei mo te anamata o te iwi.
Ka waitohu tonu raatou
Hei taa te hunga e whiriwhiri ana i te tono Tiriti o Waitangi a Parihaka, ka waitohu tonu ratou i te whakataunga a tera marama, ahakoa nga maanukanuka, nga kuurakuraku o etahi o te papa kainga o Parihaka me taa ratou kii, me nui ake te utu ki te Karauna mo taa ratou tukino i nga uri o Parihaka i nga wa o mua. E iwa miriona taara te putea paremata mo te parekura a te Karauna i a Parihaka i tera atu rautau. Nei raa Puna Bryant, tetahi o nga kaiwhiriwhiri i te whakataunga.
He ratonga awhina o nga tamariki
Kei te tino taataahia te karanga a te Minita i nga take Matauranga, a Hekia Parata kia waea atu nga kura ki nga pirihimana mena ra kei te kooroiroi, kei te whakakino ranei nga tauira. Hei taa te perehitini o te roopu tumuaki o te Tai Tokerau, a Pat Newman, he pai ake mena ra ka whakataha putea te Minita hei tautoko i nga kura ki te whakatuu ratonga awhina i nga tauira kia tika ai o ratou whanonga.
Copyright © 2017, UMA Broadcasting Ltd: www.waateanews.com