April 23, 2017
Ko Matemoana McDonald te mangai hou
Ko Matemoana McDonald te mangai hou
Ko Matemoana McDonald te mangai Maori mo Mauao Maori ki te Kaunihera o te Moana-a-Toi. I toa a McDonald, i roto i te kowhiringa pooti motuhake mo te tuuru o Mauao, maa te rima rau pooti. Na te matenga o Awanuiarangi Black i te marama o Whiringa-a-rangi, i tuu ai te kowhiringa pooti motuhake nei. Ko Black te kaipupuri i taua tuuru i nga waa o mua.
Kia whai waahi te whanau ki te tuupapaku
Me wawe te panonitanga o nga ture tupapaku i tenei whenua, kia whai waahi ai nga whanau ki o ratou tupapaku. Kei te wanangahia tenei take e te Komiti Whiriwhiri Maori o te whare paaremata i tenei wa, a, hei taa Naida Glavish, tautohito hauora, kaore nga ture o te wa i te tauawhi i nga tikanga Maori mo te tupapaku. Hei taana ano, ka timata te tangihanga i te wa e mate ai te tangata, kaua i te wa e tukuna mai ai te tupapaku ki te whanau.
Te poharatanga i Aotearoa
E ai ki te Ope Whakaora, ahakoa ko wai te Kawanatanga i tenei tau, me aronui ki te patu i te poharatanga i tenei whenua. Hei taa te Ope Whakaora, kua piki te maha e whirinakai ana ki aratou mo te kai me nga kakahu, ki te ono tekau ma waru mano taangata i tau, a, he tohu tenei o te pikinga haeretanga o te tokomaha o te hunga pohara i roto i tenei whenua.
He whawhai keenge i Rotorua
Kotahi te tane e rua tekau ma whitu nga tau, ka tuu ki mua i te kooti o Rotorua i te ra nei, whai muri iho i te pako o te puu i waenganui i etahi keenge i te papa takaro me te maakete o Kuirau i nga rangi whakataa nei. E ai ki nga pirihimana o te rohe, tokowaru nga taangata e kimihia tonutia ana e ratou mo tenei mahi moorearea i tuu i te wa i te papa takaro nga takariki, i te maakete te tokomaha o te hapori.
Ka anga whakamua a Kaikoura
E ai ki nga korero, hei te marama o Whiringa-a-nuku ka pai ano te whanga o Kaikoura hei whakamahi ma nga kaipuke me nga waka taapoi o te rohe. Kua tuku te Kawanatanga i te whitu rau mano taara ano kia oti ai te kerikeritanga ano o te whanga, whai muri iho i te rarunga o te papa moana i te ru whenua i tera Whiringa-a-rangi. Hei taa te Kaiwhakahaere i a Whale Watch Kaikoura, a, Kauahi Ngapora, kei te mahi tahi ratou ko Encounter Kaikoura, te Kaunihera-a-rohe o Kaikoura me te Kawanatanga ki te whakatika ano i te whanga.
Buddy Mikaere, mema tarahiti hou o te tarahiti o Mauao
Kua tohua a Buddy Mikaere e te iwi o Ngati Pukenga hei mangai mo ratou ki te Tarahiti o Mauao, a, hei taana, ko tona hiahia kia kimi huarahi e pai ai te tiaki i te mauri o te maunga, engari, e puta tonu mai ai hoki he hua ohanga i taua maunga. Kua whakauungia a Mikaere ki tenei turanga, whai muri iho i te matenga o Awanuiarangi Black i tera tau
Copyright © 2017, UMA Broadcasting Ltd: www.waateanews.com