April 27, 2017
He tirohanga hou mo Te Taura Whiri I Te Reo Maori
He tirohanga hou mo Te Taura Whiri I Te Reo Maori
Kua werohia te tahuhu rangapu o Te Taura Whiri e te Komiti tahuhu rangapu o Te Taura Whiri e te Komiti Whiriwhiri Maori o te whare paaremata. Ko te take i werohia ai, ko te ahua o nga pukapuka putea a te Taura Whiri. Katahi ano nga mahi whakahaere putea a te Taura Whiri ka arohaehaetia, a, e ai ki te purongo i puta i taua arohaehaetanga, kua roa te ahua o taa te Taura Whiri whakarite, whakahaere hoki i ana tahua, e hee ana. Hei taa te tahuhu rangapu o te Taura Whiri, a Ngahiwi Apanui, kua raru nga mahi whakahaere putea a te Taura Whiri i roto i nga tau, i te wehenga o etahi kaimahi me nga kuuwaawaatanga e pa ana ki te whakawhitinga o tetahi wahanga o taa ratou putea ki Te Matawai.
Nga manene e haere mai ana ki Aotearoa
E tika ana kia maatai tatou i aa tatou tikanga mo te kuhutanga mai o nga manene ki tenei whenua. Koira taa Peeni Henare, mangai toorangapu mo Tamaki Makaurau.
He puutea mate hinengaro hou mo te maori
Rua miriona taara te nui o te puutea ka tohaina e te Kawanatanga ki te Kaunihera Hauora o te motu, kia pai ai taa ratou rangahau i te paanga o te mate hinengaro ki nga Maori me nga uri moutere. Nei raa a Witi Ashby kaihautu Maori i te Manatuu Hauora Hinengaro.
Te whakahoutanga o te Temepara
Me whai te haahi Ratana i te rima rau mano taara ki te whakatika i to ratou temepara, iwa tekau tau te kaumaatua. Hei taa Piriwiritua Rurawhe o te haahi Ratana, kua timata ratou ki te kohi putea kia ea ai nga nama mo te whakatikatika i te temepara.
Harawira Craig Pearless
He pirihimana o mua, he hoia o mua, inaianei, kua hoatu te mahi nui ki a Harawira Craig Pearless kia tuhi i te hiitori o Kamupene D o te rua tekau ma waru. No Ngati Huia me Ngati Raukawa a Pearless, a, e whai putea ana i te Karahipi Ngarimu VC ki te tuhi i te pukapuka nei mo Kamupene D. Ko te nuinga o nga hoia o Kamupene D i ahu mai i nga rohe o Waikato, Maniapoto, Taranaki, Te Whanganui-a-Tara, Manawatu tae atu ki te Wai Pounamu.
He maha ngaa mahi kei mua i te Paati Maori
He mahi nui kei mua i te aroaro o Marama Fox o te RTM, mena e hiahia ana ia ki te kaahaki i te tuuru o Te Ikaroa Rawhiti i a Meka Whaitiri o Reipa. Heoi, e tautokohia ana a Fox e etahi o nga rongonui o Ngati Kahungunu, pera i a Ngahiwi Tomoana raua ko Mavis Mullins.
Copyright © 2017, UMA Broadcasting Ltd: www.waateanews.com