May 17, 2017
He puutea aawhina mo ngaa kaiako hou
He puutea aawhina mo ngaa kaiako hou
Kei te whangai te Kawanatanga i te rima ira kati rua miriona taara kia tere ake te whakangungu kaiako hou. Hei taa te Minita i nga Take Matauranga, a Nikki Kaye, ma tenei putea taapiri, ka taea e Teach First NZ te iwa tekau tauira kaiako ano te kookuhu ki taa ratou hotaka whakangungu kaiako. Ka whakapaua tenei putea ki te whakangungu kaiako putaiao, kaiako pangarau, kaiako hangarau, kaiako reo Maori hoki.
He whare herehere kaupapa maori
Kei te tautoko te kaiarahi i te roopu Mana a Hone Harawira i te karanga a tona hoariri i te Taitokerau, a Kelvin Davis o Reipa kia whakahaerehia nga whare herehere i raro i nga kaupapa me nga tikanga Maori, engari, kaore ia i te whakaae ki taa Davis karanga kia hurihia te whare herehere o Ngawha hei whare herehere mo te Maori anake. Hei taa Harawira, he whare taami mana, taami taangata a Ngawha.
Ko ngaa whare whakaahuru taiohi
Ehara i te mea e hou ana nga raru o nga whare whakaahuru taiohi kua taka ki te hee. Hei taa Bob Newson o te komihana tamariki, mai ra ano enei momo raruraru mo te tukino, te taami, te aha atu, ara, mai i te waa o te hootaka maatua whangai.
He pane kuini hou
Kei te whakarewahia etahi pane kuini hou, a, kei runga i tetahi te Whakaputanga o te tau kotahi mano, waru rau, toru tekau ma rima. Ko taa tetahi atu pane kuini hou he whakanui i te Tiriti o Waitangi. Ka whakarewahia enei pane kuini hou ki roto i Te Whanganui-a-Tara hei te ra horoi nei.
Kua whai hua ngaa uri o Waikato-Tainui
Tekau mano karahipi kua tiitarihia atu e Waikato Tainui ki nga uri o te iwi hei awhina i a ratou ki te whakatutuki i o ratou wawata matauranga. Nei raa a Rahui Papa o Waikato Tainui.
Te pire whakahou ture whenua maori
Kua tae te pire whakahou i Te Ture Whenua Maori ki te Komiti Whiriwhiri Maori, me te aha, kei te tino taupatupatuhia tonutia taua pire. Hei taa te mangai torangapu mo Hauraki Waikato a Nanaia Mahuta, kaore e kore ka mate etahi whanau e pupuri whenua Maori ana, ki te haere ki nga roia ki te kimi whakamarama he aha te paanga o nga whakahoutanga ki a ratou.
Copyright © 2017, UMA Broadcasting Ltd: www.waateanews.com