May 23, 2017
Te pire mo Ngati Paoa
Te pire mo Ngati Paoa
Kua pooti te whare paremata ki te pire e pa ana ki te hokotanga o tetahi papa reehia i Point England ki a Ngati Paoa hei kaupapa whakatuu whare ma te iwi. Ono tekau ma rua i tautoko, wha tekau ma toru i whakahee. No Reipa me Aotearoa Tuatahi te hunga i pooti whakahee.
He aha te mahi o te tarahiti o Te Korowai?
Kei te whakatuu wharau te tarahiti o He Korowai kia kore ai nga tane ki te rohe e hoki atu ano ki te whare herehere. Hei taa te tahuhu rangapu o He Korowai, a Ricky Houghton, ka noohia nga whare nei e nga tane e puta mai ana i te whare herehere mo te tukino waahine kia haumaru ai te noho a nga waahine me nga tamariki i tukinohia e ratou, i roto i o ratou whare.
Te kuini maori o te motu
No te ra inanahi i hoki koomuri ai nga whakaaro o Waikato Tainui ki te ra i whakawahia ai a Te Atairangi Kaahu ki te ahurewa tapu o te Kiingitanga, ara, i te tau kotahi mano, iwa rau, ono tekau ma ono. Nei ra a Mamae Taakerei, kuia o Tainui.
Northland Housing Forum hui a te po nei
Kei te hui te Northland Housing Forum ki roto o Moerewa i te ra nei, ki te ata whiriwhiri i nga kaupapa whare o te wa. Mai ra ano i te tau rua mano ma rima kua ata noho nga whanau, nga hapuu me nga hapori ki te whakatuu me te whakatika i nga whare o te rohe. Hei taa Tim Howard, mangai mo te roopu, e whai whakaaro ana ratou ki te whakamahana i nga whare o Moerewa kia haneanea ake ai te noho a nga kaumaatua me nga whanau.
He tautoko mo ngaa tauira maori
Kia nui ake te moni, kia nui ake ai te angitu o nga tauira Maori. Koira te karanga a nga tumuaki Maori o te roopu Te Akatea. Hei taa te perehitini tuarua a Myles Ferris, me whakapiki i te utu e haere ana ki nga kaiwhina i roto i nga kura, i te mea, e whai waahi nui ana ratou ki te angitu o nga tauira Maori.
Ngaa paihana tangata kei te patua i te wai
E maharahara ana Te Runanga o Ngati Ruanui ki te nui o te parapara e tukuna ana ki te wai, me te aha, e raru ana te ora o nga kaimoana o te rohe. E kii rawa atu ana te Whare Taatari Parapara o Hawera i tenei wa na te kaha heke o te ua i nga ra tata nei. Hei taa Debbie Ngarewa-Packer o te Runanga, e kimi kii taurangi ana ratou i nga Kaunihera o te rohe, ka tahuri ratou ki te whakatikatika i tenei raruraru, kia kore ai a muri e hokia.
Copyright © 2017, UMA Broadcasting Ltd: www.waateanews.com