June 22, 2018
Te Matenga o Homai Dave Uerata
Te Matenga o Homai Dave Uerata
Koia i te whakatauira i te reo tawhito o Tainui ki ngā iwi o te tonga o Waikato. I hinga a Homai Dave Uerata i te hōhipera o Tokoroa i te wiki nei, ono tekau mā waru ngā tau. Ko Uerata tētahi o ngā kaiwhakapaaho auroa i runga i te reo irirangi o Raukawa, ā, ka tohatoha ia i ōna mōhiotanga ki te reo me ngā tikanga tawhito i tōna wāhanga i kiia ra, ko Te ia o te kauta. Koia hoki tētahi o te paepae o te kīngitanga. Kei te marae o Te Papa o te Aroha i Tokoroa ia e tangihia ana, katahi ka haria ki Rākaunui Marae i Kāwhia, hei te rā hina, ka nehua.
Rangahau i ngā Whakatauki Taiao
Mā te whirinaki ki ngā whakaaro o te iwi Māori, nā te aha te moa i korehāhā ai, e kore ai pea ētahi atu kararehe tata mate e korehāhā. Ko Cilla Wehi o Manaaki Whenua, Ahorangi Hemi Whaanga me Tom Roa o Te Whare Wānanga o Waikato, me Ahorangi Murray Cox o Te Kunenga ki Pūrehuroa kei te rangahau i ngā whakataukī o mua e pā ana ki te taiao mei kore e kitea he kōrero nui hei ārahi i a tātou ki te tiaki i ngā kararehe tata mate o te wā. Hei tā Tākuta Wehi, i tito kōrero te Māori e hāngai ana ki te taiao i ngā tau whakamutunga o te moa, a, kei reira hoki ētahi waiata tawhito, ko ngā apakura ki te moa te take.
Whakapōtaetia ngā Mauhere o Ngāwhā
Kei te whakapōtaetia ngā mauhere e waru o Ngāwhā i te rā nei. Kei te puta o rātou ihu i tētahi hōtaka tauārai whānakotanga. Hei tā Ratema Tamati, kaiwhakahaere i te hōtaka, he mea āta waihanga te hōtaka nei kia kite marika ai ngā mauhere i te hē o te whānako motukā, moni, taputapu rānei i te whare o tētahi atu. Hei tāna, i whakamahia te kaupapa whare tapawha me ngā mātāpono o Whānau Ora i roto i tēnei hōtaka.
Whānau te Pepi a Jacinda Ardern
Kua whānau mai te pepi a te peremia a Jacinda Ardern, he kōtiro. Kua tuku wahakura te roopu Kākāriki ki te peremia hei koha mā rātou ki a ia. Hei tā Marama Davidson, kaiārahi i Ngā Kākāriki, kaore he mahi nui atu i tēnei ao katoa i te tiaki pepi, tamariki hoki. Hei tā Kiritapu Allen o Reipa ko te peremia te rangatira o te motu, engari, he rangatira hou tōna inaianei.
Me Whirinaki a Oranga Tamariki ki te RWMTO
Hei tā te Perehitini o te Roopu Wāhine Māori Toko i te Ora, mena e hiahia ana te Manatū Tamariki kia tokoiti haere te maha o ngā tamariki kei raro i tōna maru atawhai, me tuku i tētahi wāhanga o tōna mana nui ki ngā whānau Māori. Hei tā Prue Kapua, mai rā anō te RWMTO e mahi tahi ana me ngā whānau, nō reira, me whirinaki a Oranga Tamariki ki a rātou kia mahi tahi ai rātou katoa.
Nā Raukawa FM te whakaahua nei.
Copyright © 2018, UMA Broadcasting Ltd: www.waateanews.com