July 09, 2018
Pire Hauwaro Kore
Pire Hauwaro Kore
Kei te patu a Marama Davidson o Ngā Kākāriki i te huarahi i tēnei wā, ki te akiaki i ngā whānau ki te tautoko i tana pire e kiia nei ko te Zero Carbon Bill. Ko te whainga o te pire nei, kia hauwaro kore a Aotearoa ā te tau rua mano rima tekau, mā reira pea ka tika anō te pā mahana o te ao. Hei tāna, e pā kaha ana te mahana haeretanga o te ao ki ngā hapori Māori, ina koa rā, ko ēra e noho takutai moana ana.
Pūrongo Growing Up In New Zealand
Ko tā te pūrongo Growing Up In New Zealand, he āta whai i te oranga o ngā tamariki whitu mano o te motu i a ia e pakeke ana, ka mutu, kua pakeke katoa ināianei. Nō reira he nui hoki ngā kōrero e taka mai ana ki ngā kairangahau o Aotearoa, ao pākeha mai, ao Māori mai hoki. Ko te reo Māori tētahi waahi e kaha kitea ana ngā hua, ā, he kaha nō te kairangahau Māori ki te āta ruku i te hōhonutanga o ngā kōrero katoa kua puta i te rangahau. E ai ki a Taiarahia Black o Te Whare Wānanga o Awanuiārangi, ko te mea whakamiharo o te rangahau, he matapihi tēnei e tāea ai e te kairangahau te titiro ki te ao i nōhia ai e te tamaiti, ka mutu, hei reira mōhio mai ai tātou, he aha rawa rānei ngā rautaki whai hua.
Te Ara Waka ki Maungarei
Kua tīmata te Mana Tūpuna Maunga o Tāmaki Makaurau ki te whakatakoto i te ara e mutu ai te haere a ngā waka ki te tihi o Maungarei-Mount Wellington. Hei tā te ūpoko o te Mana Tūpuna Maunga a Paul Majurey, ahakoa kua whakahē ētahi i tā rātou kati haere i te haere a ngā waka ki te tihi o tēna maunga, o tēna maunga i roto o Tāmaki, ko te nuinga o ngā tāngata kei te whakaae.
Copyright © 2018, UMA Broadcasting Ltd: www.waateanews.com