August 29, 2014
E whakataa ana te Kiingi
E whakataa ana te Kiingi
Ka piki tuuranga a Tukoroirangi Morgan ki te haere ki nga mahinga ookawa mo Kiingi Tuuheitia
i tenei waa e whakataa ana te Kiingi i te hoohipera e mea ana te korero ko te mate huka te puutake o te maauiui.
Kaati hai taa Nanaia Mahuta he karangarua ki a Tuuheitia kei tona taha ko te whaanau whaanui me te arohanui:
[CLIP]
Nanaia Mahuta – https://secure.zeald.com/uma/play_podcast?podlink=MjE1OTM=
Nga tatauranga piki heke.
E rongo ana a John Key ratou ko tana roopu Naahinara i nga paanga o nga kaupapa paruparu no konaa kua heke te tautoko o te motu ki a ratou.
Ahakoa 50 paiheeneti tonu te aroha ki a Naahinara kua heke i te 4 ira 3 paiheeneti mai te putanga o nga korero i te pukapuka Dirty Politics a kaituhi Paakeha Nicky Hager.
Heoi ano kei te aata piki te tautoko mo Reipa whaa wiki mua mai te koowhiringa pooti.
He taniwha hikuroa ka tatuu mai
Ka haramai te Hekeretari Tianara o te Kaahui o te Ao a Ban Ki Moon ki Aotearoa a tera wiki.
He aha ko tana kaupapa ki konei ka whakahoonoretia ki te tohu taakuta a te Whare Waananga o Taamaki Makaurau.
E whitu tau tana roa hai kaihautuu o te United Nations ko ia te tuawaru o nga heekeretari tianara.
E matapae ana hei te roanga o te waa ka piki tuuranga a Helen Clarke mo Ban Ki Moon.
Reo moumou
He moumou rawa, he whakapau taima noa iho te kaupapa here a Pita Sharples hai whakaora i te reo Maori.
Koia te tirohanga a Peeni Henare kaitono o Reipa mo te rohe o Taamaki Makaurau.
Ki raro i te roopu hou o Te Maataawai ka tirohia nga tari Maori me te ahua o a ratou whakahaere reo.
Hai taa Henare kiihai te reo i aata tautokohia ko Te Taura Whiri i te Reo tetahi i toti, i tapepe me te iti o te puutea.
Ki a ia horekau he take kia hanga i tetahi whakapaparanga hou kei whakaheemanawatia te tupu o te reo rangatira.
Maniapoto kapa haka
He mahi tuku iho kei te piikautia ia tau.
Hai taa maangai korero Aturangi Stewart koia te tikanga o te ahurei kapa haka mo nga kura tuarua o Ngati Maniapoto e whakahaerehia ana i Otorohanga i tenei waa:
[CLIP]
Aturangi Stewart – https://secure.zeald.com/uma/play_podcast?podlink=MjE1OTI=
Matakookiri piiataata mai.
I kitea he matakookiri ki te rangi i te po raa araa i te Taihauaauru o Aotearoa.
E hia kee taangata i riingi atu ki nga piriihimana huri noa na te kitenga o te rama piiataata.
Ki etahi korero i rere taua matakookiri tata ki te mata o te whenua kaatahi ka ohorere te iwi.
Te mea kee he karaka, he kikorangi te kano o tana whiore, he ataahua.
Copyright © 2014, UMA Broadcasting Ltd