August 26, 2014
E tapepe ana a Naahinara?
E tapepe ana a Naahinara?
Na runga i te tutuunga o te puehu toorangapuu inakuaraa e whakapono ana a Reipa kei te kite i nga ngoikoretanga ki te ahua o te kaawanatanga.
Ki etahi ka noho tuuwhera a Naahinara ki nga wero o etahi atu mo te taha ki te oohanga ki te whakahaere puutea me te kii ko te kaupapa kia hoatu puutea ki nga taangata hoko whare kua tae takamuri mai aa e meingatia ana he aha te kaawanatanga i kore ai e whakatuu taua kaupapa tautoko e rua tau ki muri.
Bennett kei te piki haere.
Taka mai he whetuu, ara ake ano he whetuu.
Te ahua nei kei te pahuu nga tumanako o Judith Collins i runga i ona hapa inakuaraa e whakapae ana ko Paula Bennett kee tera ka piki i te ara ki te taumata o nga puu nunui i roto o Naahinara.
E mea ana etahi kaiwetewete take toorangapuu kei te huri te titiro a te Piriimia ki a Bennett i tera marama i whai waahi ia ki te tuuranga tuaiwa i te raarangi taangata o te kaawanatanga he tohu pai tera mo Bennett.
Kiingi kei te maauiui.
Tera tonu pea ka tuku a Kiingi Tuuheitia i etahi o ana mahi ookawa ki tana tama tuatahi ki a Whatumoana.
Koia taa Pita Sharples Minita Take Maori horekau he korero atu i tera e rongohia ana i tenei waa.
Kei roto te Kiingi i te hoohipere o Waikato whai muri te paanga o te mate manawa ki a ia inanahi.
E paakinotia ana te Kiingi Maori e te mate pukupuku, e te mate huka me te kii kua kaha a Tuuheitia ki te whawhai i era ahuatanga.
E mahi tonu ana i te mahi.
He kaha te piripono o te roou Naahinara ki a ratou kaupapa here o te waa.
Koia te korero a Hekia Parata ki a Waatea i tenei ata i te tirohanga whakamua ki te Koowhiri Pooti.
Ko te hoko whare me te taha oohanga o Aotearoa kei te tirohia e te kaawanatanga i tenei wiki hai taa Parata kua whakarewa i taa ratou mahere ki te whakawhaanui i nga akoranga mahi a rehe ki nga rangatahi Maori Pasifika.
Ki a ia ano he tohu era momo kaupapa o te piirangi ki te whakapai ake i nga tatauranga whai mahi mo te hunga rangatahi.
McKenzie, tiakina nga rawa taiao.
He tino kai te wai maori me whakarite hai taonga motuhake.
Koia te hiahia o te Paati Maori i te takotoranga o taa ratou kaupapa hai whakaruruhau i te taiao.
Hai taa Chris McKenzie kaiwhakataetae o te Roopu Toorangapuu Maori i te rohe o te Taihauaauru kia haumaru te ahua o te wai mo te taha ki te inu, ki te kaukau, ki te kohi kaimoana.
Hai aa McKenzie ano ma ratou te tuuranga o te kaitiaki e whakarangatira ma te hoatutanga o nga rawa ki nga iwi, ki nga hapuu, ki nga whaanau i raro i nga whakataunga Tiriti o Waitangi.
Kei te kite aaputa tonu ki nga kura.
He nui nga momo tautoko ki nga kura rawakore kei te tukua i runga i te kore mohio ki nga tino raruraru i aua kura.
Koia te whakapae a nga kaituhi o tetahi pukapuka hou e tirohia ana ki nga whaanui haere o nga aaputa i o tatou haapori.
E mea ana a kaituhi Vicky Carpenter na te korenga o nga rawa tautoko ka kore nga tauira o nga kura kore puutea e whai waahi ai ki nga mahi taapiri otiraa ki tua atu i nga kaupapa ako o te marautanga.
Hai taana ano me mohio nga kaiwhakahaere ki te hiranga o aua momo mahi he ako hoki ki roto.
Ka mutu ko nga haangarau tiketike tetahi o nga mahi taapiri e korerohia nei.
Copyright © 2014, UMA Broadcasting Ltd