September 16, 2014
Tatauranga i te Taitokerau
Tatauranga i te Taitokerau
E ai ki nga tatauranga o te waa he whakataetae tata te korero mo te rohe pooti o te Taitokerau.
Ki taa te rangahau i raro i a Whakaata Maori kotahi paiheeneti te rerekeetanga o te kaute i waenga i a Hone Harawira o Mana me Kelvin Davis o Reipa.
Hai taa Harawira koia hoki te korero i te rangahau i mua i te koowhiringa pooti i te tau 2011 engari i te raa tonu o te pooti e ono paiheeneti te aaputa o te toa ki a Harawira.
Hai taana ano kua kaha tana roopu ki te paatootoo i nga kuaha huri katoa te rohe tera pea ka kite i nga hua o tera mahi nui.
Ko wai ka mohio ki te whakaaro
Kei moka tawhiti te roopu Kaakaariki e tuu ana me a ratou tirohanga toorangapuu.
Koia te korero a Winston Peters rangatira o Aotearoa Tuatahi i tenei waa o te matapae ka waiho pea maana te kupu whakamutunga ko wai e tuu hai kaawanatanga.
Hai taa Peters kaahore ia e whakaae ana ki te hiahia o nga Kaakaariki ki te koopaki whakahaere puutea kaahore hoki ia e pai ana ki te whakaaro kia rua nga Piriimia tuarua i te waa kotahi.
Me pooti ka tika
E oho koia te tohutohu a nga mema paaremata Maori ki a tatou nga kaipooti araa me whawhai tatou kia kore e ngaro a tatou tuuru toorangapuu Maori.
E mea ana a Te Ururoa Flavell rangatira takirua o te Paati Maori kei te hee rawa atu te korero a etahi he tikanga whakawehewehe nga tuuru Maori ko taa Flavell he tikanga kee aua tuuru kei te whakarangatira i to tatou whenua o Aotearoa.
Whaanau Ora he rongoaa.
Kua whakarewa te Paati Maori i taa ratou kaupapa Whaanau Ora i te raa nei whai muri to ratou raa whakangahau mo nga whaanau ki Whakaoriori inanahi.
E mea ana a Maarama Fox kaiwhakataetae o te Paati Maori i te Ikaroa Raawhiti mehemea ka whakahou i nga tikanga ki te kainga, ka whakahou i te ahua o te haapori.
Kaati ko te hiahia tonu kia whakapaa atu a Whaanau Ora ki te maha ake o nga whaanau.
Ka aroha ki nga rangatahi rapu whare.
E hia kee taangata kei te noho kainga kore i tenei waa.
Ko Otautahi tetahi waahi kei reira te tini o nga rangatahi e oke ana ki te rapu whare mo ratou.
Ki etahi korero he maha ake nga whare ohotata mo nga kararehe i nga whare ohotata mo te tangata.
Kaati ko te utu nui o nga whare te puutake o te raruraru.
Ka kite painga ki nga kura hourua.
E tautoko ana a Peeni Henare te tangata o Reipa i te tuuru pooti o Taamaki Makaurau te mahere ki te whakatuuwhera i tetahi kura hourua ki te tonga o Taamaki.
Hai taa Henare e tika ana kia kookiri i nga kaupapa ma nga whaanau me nga haapori e aarahi ahakoa te whakahee o Reipa ki nga kura hourua.
Ki taa Heenare ano ko te oranga o nga tamariki te mea nui.
Copyright © 2014, UMA Broadcasting Ltd