September 09, 2014
Ka hui a Ipurangi Mana
Ka hui a Ipurangi Mana
Ka haramai ki te tonga o Taamaki Makaurau te ope o te roopu Ipurangi Mana a te po nei ka tuu taa ratou hui nui ki Otara ki te kura tuarua o Hillary i te whitu karaka.
E matapae ana ka tatuu ko nga kaitautoko Pasifika ki reira hai taa James Papalii te kaiwhakahaere Pasifika o Mana ka hau atu nga puu nunui o te roopu ki te taha tonga o Taamaki hai taana ki nga whanaunga o te Moana Nui a Kiwa whakapiri atu ki te hui raa ka kite i nga painga hai oranga mo te haapori, otiraa mo te motu whaanui.
He korero huakore
Kaua hai whakarite i a Whakaata Maori hai whutupooro toorangapu noa iho.
Koia te whakahau a Georgina Te Heuheu tiamana o te poari o to tatou teihana pouaka whakaata whai muri i nga whakapae a Hone Harawira o Mana raaua ko Kelvin Davis o Reipa kei ngaro etahi tuuranga mahi,
kei tapahia etahi ratonga, kei huunuku atu a Whakaata Maori ki Rotorua.
Hai taa Te Heuheu ano kua arotakengia nga mahi aa he mea nui kia tika te anga o to ratou whare me te arotahi ki te reo me ona tikanga ko nga whakaaro o te tokorua no raaua ake.
Nga Hononga o te Kingitanga
A tera wiki ka tuu ano te rangi e kiia nei ko te raa o te Kiingitanga ki te Whare Waananga o Waikato.
Tetahi tikanga o te hui hai whakanui i nga hononga tata i waenganui i te Kiingitanga me nga iwi huri noa.
Ko Taakuta Lance O'Sullivan tetahi o nga kaikauhau maana e kookiri te hiranga o te hauora ki a tatou i tenei ao hurihuri.
Atu i tera ka korerohia nga kaupapa tuku iho mo nga pakanga whenua me te titiro whakamuri ki nga pakanga i Rangiriri, Oraakau, Pukehinahina me Te Ranga.
Ka mutu ka taka mai i te maatauranga me nga korero mahinga kai ka whai waahi hoki etahi kaiwaiata ki te mahi i a ratou mahi pookai taringa.
Whakapeehia nga mako tuku puutea.
Kua whakarewa ano a Reipa i taa ratou kaupapa ki te aata whakahaere i nga mako tuku puutea.
Ko taa Reipa me whakarite ture kia kore e patu ma te itarere nui nga whaanau noho tuuwhera.
Ko taa ratou hoki he whakauu hootaka tuku puutea kia paapaku he itarere, kia kore ranei he itarere.
Heoi ano ka nui te tautoko a nga ratonga aawhina whaanau ki nga kaupapa nei.
Kia pai te oranga whare
Kia pai te hanga o nga whare e reti atu ai hai a mua i te toru tau e tuu mai nei.
Koia tetahi waahanga o te kaupapa whare e karangahia nei e te Paati Maori me to ratou hiahia kia whakaroa i te hootaka whakamaahanahana whare.
Hai taapiritanga ka aawhina hoki i nga whaanau e oke ana ki te hoko i o ratou whare.
Hai taa Te Hira Paenga te tangata o te Paati Maori e whakataetae ana mo te rohe o te Taitokerau ahakoa kei hea o tatou whaanau e noho ana kia mahana, kia maroke te whare.
Ko wai ka hua?
He whakataetae tino tata te korero mo te rohe pooti Maori o Taamaki Makaurau.
Ko Peeni Henare o Reipa raaua ko Rangi McClean o te Paati Maori te tokorua e tukituki ana i tenei waa 28 paiheeneti te aroha ki a McClean 27 paiheeneti ki a Henare.
Hai taa David Cuniliffe rangatira o Reipa ko tana tuumanako kia toa nga rohe Maori katoa.
Ki taana ano horekau he waahi mo te Paati Maori ki tetahi hononga a roopu pena ko ia te rangatira.
Copyright © 2014, UMA Broadcasting Ltd