September 26, 2014
He whakatau kino
He whakatau kino
Kua peia e te Alcohol Regulation and Licensing Authority te tono a te Poari a Haapori o Maangere Otaahuhu ki te whakakaahore i te tuunga o tetahi toa hoko waipiro paatata atu ki te kura o Southern Cross i Maangere.
Rua mano nga aakonga e haere ana ki taua kura hai taa tumuaki Robin Staples ko te ahua nei kua whakaririkatia nga hiahia o te haapori whaanui. Inanahi i whakaae te Kaunihera o Taamaki
kia whai mana nga poari haapori ki te whakahee, ki te aatete i nga raihana hoko waipiro.
Tapahi tuuranga mahi
Tera tonu pea ka tapahi a Sealord i nga turanga mahi 97 i to ratou wheketere mahi ki Whakatuu.
E mea ana nga kaiwhakahaere ka rongo te pakihi nei i nga taimahatanga puutea ki etahi waahanga mahi na reira me whaaiti taa ratou titiro ki nga taputapu whai hua.
Ahakoa nga korero nei hai taa Maataanuku Mahuika tiamana o Sealord he puumau te ahua a puutea o te kamupene whaanui ka taka haere i nga hua ki a ratou.
Tuna paakinotia
No tuawhakarere te tuna e mohiotia nei ko te piharau engari kei te ngaro haere te piharau na reira kua hui tahi te hunga e aroha ana ki te oranga o taua ika tawhito ki te korero hoki mo nga whakatuma a taiao kei te patupatu i te piharau.
Hai taa Doug Jones o te Wai Maori Trust kei te kohi moohiohio, kei te taautu hoki i nga kaupapa e paa ana ki tera o nga taonga.
Robertson ko ia te tangata?
E tupu haere ana te karanga ki roto o te roopu Reipa kia tuu ko Grant Robertson hai rangatira raaua ko Jacinda Adern hai rangatira tuarua mo ratou.
Ahakoa pehea hai taa Robertson kei te tautoko ia i nga tukanga a te paati hai whakatau i nga kaupapa pera.
Na reira ki etahi whakapae ka heke a David Cuniliffe i tana tuuranga akuanei.
He marae hou.
Kua tiimata nga mahi ki te hanga marae i Ngaamotu.
Kua roa te hapuu o Ngati Te Whiti e tatari ana aa ko te tikanga kia whakatuu to ratou marae hou i te takutai ki runga i to ratou ake whenua…whaa heketea te rahi. Hai taa kaiwhakahaere Shaun Keenan
ka hanumi i nga taha e rua te ao tawhito ki te ao hou. Kaati e meingatia ana ko te whakahokihanga tera te mauri ki te whenua.
He huinga mo te wai.
Ka whakahaere hui te Kaahui o nga Rangatira Whakaruruhau Wai Maori huri noa te motu ki te matapaki i nga whakaritenga o te waa.
Hai taa maangai korero a Willie Te Aho e kaikaa ana taua kaahui ki te whakarongo ki nga tirohanga a te Maori mo ona hononga ki te wai.
I te mutunga ake hai taa Te Aho ano me pehea nga hapuu me nga iwi e tiaki i aua hononga kia kore e raweketia e tetahi atu.
Copyright © 2014, UMA Broadcasting Ltd: www.waateanews.com