September 23, 2014
I mahue a maataawaka.
I mahue a maataawaka.
70 paiheeneti o nga Maori i Otautahi i whakaririkatia e nga tari ruu whenua no konaa kua whakaroa te mamae ki a ratou.
Koia te kitenga o nga kairangahau o te Whare Waananga o Otaakou hai taa ratou ano i aawhinatia nga uri o Ngai Tahu engari i mahue ko nga uri maataawaka o iwi kee.
Ka mutu ka noho tauwehe nga taha e rua, ko tangata whenua raaua ko maataawaka.
He tuuru Maori ki Ngaamotu?
A te po nei ka tuu te taupatupatu whakamutunga mo tetahi tuuru Maori i te Kaunihera o Ngaamotu.
Mehemea ka whakaae te Kaunihera katoa ki tera kaupapa koia te tuatahi o nga tuuru Maori ki tetahi Kaunihera a takiwaa me kii.
E matapae ana ka kaha whakahee te roopu Grey Power i taua tuuru e kaha kookiritia ana e te koromatua a Andrew Judd.
Kaati kua huri te aro o te haapori whaanui ki tenei kaupapa tautohenga.
Ka korero i nga kaupapa uaua.
He hui aroha kore kei te whakahaerehia mo te roopu Reipa.
Koia te korero mo te tuatahi o a ratou hui whai muri i te parekura o te koowhiringa pooti.
Taaria te waa ka whiriwhiri me kore a rangatira David Cuniliffe e tuu tonu hai kaihautuu mo ratou.
Ki nga korero o te waa e piirangi ana a Cuniliffe ki te pupuri ki tana tuuranga i tenei waa kaore ano tetahi atu kia whakatuu te ringa kia piki tuuranga moona.
Ruu te whenua i Wairarapa.
Kua kaha te ruu o te whenua i Wairarapa i tenei ata aa i rongohia whaanuitia i te Ika a Maaui. 5 ira 5 te kaha o te wiriwiri
24 kiromita te hoohonutanga, paatata atu ki te taone o Dannevirke tana puutaketanga.
Horekau he tangata i whara engari na te kaha ngaaueue o te whenua ka whakaoho i te tokomaha.
Ehara no Mana te hee.
Kei te hee te whakapae a Reipa na te hononga o te roopu Mana ki te roopu Ipurangi te taha mauii i whakahinga.
Koia te korero a Laila Harre o Ipurangi Mana me tana kii me titiro ano a Reipa ki o ratou ake raruraru a roto me to ratou hononga ki nga Kaakaariki.
Hai taa Harre ano he pooturi te whakautu a tana roopu ki te karo i nga whakawhiunga o te taha matau.
I te mutunga ake i pakaru taa ratou kaupapa i te marama i mua tata atu i te koowhiringa pooti.
He aha to mahere?
He aha te rautaki waa roa o te Paati Maori?
E mea ana a Meetiiria Tuurei o nga Kaakaariki na runga i te otinga pooti i te Raahoroi kaahore te nuinga o nga kaipooti e pai ana ki te aronga o te Paati Maori me a ratou kaupapa.
Ahatia hai taa Tuurei ano e pouri ana ia ki te rahi o nga taangata i pooti mo ratou.
Copyright © 2014, UMA Broadcasting Ltd: www.waateanews.com