October 14, 2014
Whakatupuria nga paerewa ako.
Whakatupuria nga paerewa ako.
Mehemea ka whakarerekee i nga tikanga whakahaere a nga kura ma reira ka whakapai ake te tuu a nga tauira Maori.
Hai taa Hekia Parata Minita Take Maatauranga ko te hootaka e kiia nei Building for Success tetahi atu ano o nga kaupapa e whakatupu ai te oranga o te tamaiti i te kura me te waariu o nga ahuatanga Maori i te waa o te ako.
Papakaainga hou
Kei te aarahi te Tari Tiaki Maori o te Tumu Paeroa i tetahi hootaka ki te hanga i tetahi waahi papakainga i Poneke araa i te rohe o Evans Bay.
No nga uri maha o te paa o Te Aro te whenua e tirohia ana te tikanga kia whai kaainga nga uri o taua paa ki runga i to ratou ake whenua.
Hai taa Jamie Tuuta toihau o te Tumu Paeroa he tauira pai te hootaka whakatuu whare nei mo te whakahononga o nga whaanau ki nga whare pai te utu.
He huarahi whakahou
Ka tiimata te whakahounga o te Waananga o Aotearoa ka tapahia etahi tuuranga mahi.
Koia te korero a Jim Mather me te hiahia ki te hanumi i te Waananga ki to ratou peka e whakahaere ana i nga akoranga tawhiti otiraa i te kaainga.
Hai taa Mather ano me rapu huarahi hai whakapai ake i nga mahi koia te whaainga.
I te mutunga ake e piirangi ana ia ki te whakakikii i nga tikanga whakahaere katoa.
Reipa rapu rangatira.
Kua ara ake ko Andrew Little te tangata e paingia ana e etahi kia tuu hai rangatira o te roopu Reipa.
Na te hekenga o David Cuniliffe inanahi raaua ko David Shearer i tenei raa e toru nga hoiho e toe ana ko Little ratou ko David Parker ko Grant Robertson era.
Te mea kee kua huri a Cuniliffe ki te tautoko i a Andrew Little heoi ano hai taa Little e kore ia e whiriwhiri i a Cuniliffe hai tuarua i tana taha.
Me kimi rongoaa.
Kaare he take o te pakanga atu ki te kaawanatanga.
Koia te tirohanga a Neil Te Kani te tiamana o te roopu o nga kaiahuwhenua Maori e whakatuputupu i te hua kiwifruit.
Ka huri nga kaiahuwhenua Paakeha ki te wero i te kaawanatanga mo te pakarutanga o a ratou maara o a ratou huaraakau i te maauiutanga PSA.
Tekau paiheeneti o nga kaiahuwhenua kiwi fruit katoa he Maori ko taa nga kaiwhakatupu Maori he whakatewhatewha me pehea e aarai i taua mate a muri atu nei.
Penehiini utu heke?
Na te hekenga o te utu o te hinu ki nga maakete tauhokohoko o te ao kua tapahia te utu ki o tatou teihana penihiini ki nga korero o te waa koia te otinga o te heke haere o taua utu huri noa he tohu pai mo te hunga taraiwa motukaa.
Ahatia he uaua ki te matapae i te piki i te heke ranei o te utu penehiini na te rahi o nga momo paanga oohanga i tenei waa.
Copyright © 2014, UMA Broadcasting Ltd: www.waateanews.com