October 01, 2014
Reipa ka whai amorangi.
Reipa ka whai amorangi.
E matapae ana ka whiriwhiri a Reipa i to ratou rangatira hou hai a mua i te Tiihema.
Kua heke a David Cuniliffe i tenei wiki ko David Parker raaua ko Annette King nga kaihautuu o te waa mo Reipa.
Ko Cuniliffe raaua ko Grant Robertson kua whakatuuturuhia ma raaua e whakataetae ki taua tuuranga teitei.
Hai taa Robertson ko te mea kia tika te whakahaerenga o te whakataetae raa hai aha i nga kupu kangakanga.
Reo ako, reo tupu.
Ki nga rangahau a te Tari Tatauranga kotahi haurua o nga tamariki i haere ai ki tetahi kohanga reo ki tetahi kura kaupapa ranei ka taea te korero i te reo Maori.
Koia te kitenga o te rangahau a te tari e kiia nei ko Te Kupenga e tirohia ana te mahinga o te reo.
Te mea kee ka kaha ake nga tamariki e rongohia ana te reo i te kaainga ki te korero heoi ano
he whakahirahira tonu te tuuranga o nga kura reo Maori ki te whakaako i to tatou reo ki a tatou tamariki mokopuna.
Titiro whakamua
Kua huri kee te Paati Maori ki te titiro whakamua ki te tau 2017.
Ka whakahaere hui ratou i tenei wiki huri noa te motu ki te matapaki i te ahua o to ratou hononga ki a Naahinara.
Kaahore e mohiotia ana me kore a Te Ururoa Flavell e whai waahi hai Minita Take Maori engari kei te maaia te roopu ma nga pooti motuhake ka piki a Maarama Fox ki paaremata hai mema raarangi mo te Paati Maori.
Apiti atu e kii ana te maha o nga mema me whakarite wawe i nga kaiwhakataetae ki nga rohe Maori hai a mua i te marama o Hoongongoi a tera tau.
Rotorua hai aha i nga tuuru Maori.
Kei tena rohe ana kaupapa motuhake hai taa kaikaunihera i Rotorua a Trevor Maxwell pera ano a Rotorua.
Hai taana tino kore ia e whakaae ana ki nga tuuru Maori i tana kaunihera.
Ahakoa kua whakarite tuuru i te Kaunihera o Ngaamotu inakuaraa e kii ana a Maxwell ka whai tuuru kee te Maori ki nga teepu o te Kaunihera o Rotorua.
Ki a ia ano he pai ake kia uru atu te Maori ma te hiikoitanga o te huarahi auraki ma reira ka taea te korero ki nga komiti whakahaere katoa.
Kaati tokotoru nga Maori i whai reo ki raro i te puunaha whaanui o te pooti kaikaunihera.
Nga korero mo Mana
Ehara i te mea he otinga ohorere te takanga o te roopu Mana.
Koia te tirohanga a Russell Norman rangatira takirua o te roopu Kaakaariki.
Hai taa Norman i hee te rautaki a Mana ki te awhi i a kimdotcom me tana roopu Ipurangi hai taana ano i te mutunga ake he uaua ake te mahi ki te whakahinga i te kaawanatanga i te koowhiringa pooti taa te mea kiihai a Ipurangi Mana me a ratou korero i aronuitia e nga kaipooti.
Copyright © 2014, UMA Broadcasting Ltd: www.waateanews.com