October 30, 2014
Ka huunuku nga kaimahi ki hea?
Ka huunuku nga kaimahi ki hea?
E tika ana me titiro a Whakaata Maori ki nga waahi maha hai kainga hou mo ratou.
Koia te korero a Te Ururoa Flavell Minita Whanake Maori mo te whakapae ka huunuku atu to tatou whare pouaka whakaata ki Rotorua.
Hai taa Paora Maxwell toihau o Whakaata Maori koia tetahi huarahi e whakaarohia ana me te kii a Flavell kotahi miriona taara ia tau te utu o te whare i Taamaki aa he iti rawa taua whare.
Hai taa Flavell ano he mea nui kia maarama te poari o Whakaata Maori ki te ahua o to ratou tupu a nga tau kei te haere ake.
Take ahuwhenua Maori.
Kei te poonotinoti te tupu o nga kaupapa ahuwhenua a te Maori koia te korero a Taakuta Nick Roskruge kairangahau i te Whare Waananga o te Papaioea.
Ko nga kaipupuri whenua kei te ngaro, ko te tauwehenga o nga whenua Maori me te uaua ki te whakapaa atu ki nga puutea tautoko koia era ko etahi taiapa kei te aarai i te piki o te Maori ki te ao ahuwhenua.
Ahatia hai taa Roskuge ano me titiro nga roopu ahuwhenua Maori ki nga tauira tika…ki a Mangatuu, ki a Pariniinihi, ki a Tuuaropaki, ki a Wakatuu.
He hononga tauhokohoko.
He wehi no etahi kei kino ake te hauora o te Maori pena uru atu te kaawanatanga ki te hononga e kiia nei ko te Trans Pacific Partnership.
I raro i taua whakaritenga ka waatea nga kamupene nunui ki te aatete i te whakaheenga o a ratou mahi, o a ratou taputapu pera i nga kamupene tuupeka me te kii ka mataku nga kaawanatanga ki nga paanga.
I te mutunga ake ki etahi ka memeha nga motika iwi taketake ka whakaruruhau kee i nga motika o nga kamupene nunui ka piki haere te utu o nga pire rongoaa ka tiakina nga motika o nga roopu tuupeka ka waatea ratou ki te whakatairanga aarai kore i te paipa.
Takatuu ake.
Ahakoa he whati tata paapaku te mate ebola ki a tatou kua huri tonu etahi hoohipera pera i a Whakatuu i te Waipounamu ki te whiitiki i a ratou mo te kino.
E mea ana nga taakuta he rite ki te rewharewha nga tohu o ebola i tona timatanga, ka mamae hoki nga maihara me te korokoro ka anini te maatenga.
Heoi ano kei te tirohia nga tikanga mo te tiaki tuuroro huri noa nga hoohipera o te motu kia taea te aarai taua mate pena tatuu mai ki Aotearoa.
Whai oranga.
E whakapae ana hai te roanga o te waa ka piki te oranga o te Maori ki rite ki to te Paakeha oranga i tenei ao.
Koia te korero a Ahorangi Tony Blakely o te Whare Waananga o Otaakou kua piki haere te roa o te Maori i te ao kikokiko nei mai raano engari i enei raa ka paakinotia to tatou oranga e nga kaupapa paapori.
Ki a ia ano ko te ahua o nga whare, ko te paanga tootika ki nga ratonga hauora, ko te nekehanga ki tetahi ao auahi kore koia era ko nga ahuatanga e whakapiki ai te oranga o Ngai Tatou.
Karoro ngaro haere.
Kei te mate haere te karoro pera i te kiwi me te kaakaapo.
Koia te titiro a te tari taiao o te Papa Atawhai ko te ngutu pango te momo karoro kaahore e kitea whaanuitia ana.
E matapae ana ka heke to ratou maha ma te whitu tekau paiheeneti a nga tau toru tekau e tuu mai nei.
Kei te noho tuuwhera hoki te karoro ngutu whero me te kii a nga kairangahau he nui nga ahuatanga o naianei kei te patu haere i tera manu inu tai.
Copyright © 2014, UMA Broadcasting Ltd: www.waateanews.com