November 18, 2014
Huango he mate kino
Huango he mate kino
E tupu haere ana nga taimahatanga o te mate huangoo ki a tatou ratonga hauora.
E mea ana a Huango Aotearoa koia te maauiui tuawhaa mo te whakamatemate taangata i Aotearoa.
Ko te momi paipa tetahi puutaketanga nui o te huangoo ko te korenga o te haa me te maremare nga tino paanga.
Kaati kei te whakatenatena a Huangoo Aotearoa i nga waahi mahi ki te whakarite i nga hootaka mutu kaipaipa mo o ratou kaimahi.
Rangatiratanga o Reipa
Hai apopo ka karanga a Reipa i nga otinga o te whakataetae
kia kite ko wai e tuu hai rangatira hou mo ratou. Ki etahi korero a nga kaiwetewete toorangapuu ko Andrew Little raaua ko Grant Robertson te tokorua e matapaetia ana ki te tuu tiketike.
Kei reira tonu a Nanaia Mahuta me tona reo Maori e whakataetae ana ki etahi atu ka tiipakohia ko ia hai rangatira tuarua o te paati.
Kia tika nga whakahaere ako.
E tika ana me whakapai ake nga waananga me nga takiura i te rahi o to ratou tautoko mo nga kaiako me nga tauira kapa haka.
Koia taa Tihi Puanaki o Otautahi whai muri te tirohanga atu ki nga tikanga whakahaere o etahi akoranga kapa haka i Te Whare Waananga o Awanuiaarangi me te Kuratini Haangarau o Taranaki.
Hai taa Puanaki ano me aronui ki to kaupapa koia tetahi mea nui, koni atu i tera me titiro nga kaiwhakahaere ki a ratou ano.
Tuukinotanga aukatingia.
Me mutu te tuukinotanga ki nga kaainga aa me whai waahi te tangata whenua ki tera kaupapa nui.
Ko etahi kaimahi paapori e kii ana he mauritau nga hootaka whakaohooho haapori pera i te take riipene maa engari me whakauru atu ko nga kaiwhakahaere Maori ki te hiki ake i aua kaupapa.
I te mutunga ake hai taa etahi ko te whakaritenga o nga taiao whai hua te tino wero kei mua i nga kaimahi.
Nga raruraru paapori
He waahi ataahua engari he nui nga raruraru i Opunake rohe o Taranaki.
E mea ana etahi kainoho ko nga whanonga o nga keenge me te taimiro P kei te patu haere i to ratou haapori.
Na reira ratou e kii ana kua tae ki te waa kia maaro ake te ringa o te ture i reira kia kaha hoki nga whaanau me nga hoa o te hunga noho tuuwhera ki te aawhina i a ratou na te mea he uaua ki te rutu i nga raruraru rangatahi kei te kitea.
Aronuitia te rangatiratanga o nga iwi.
Kaahore te Kaawanatanga e whai ana ko taa ratou i kii taurangi ai araa ki te whakahaere i te tukanga Tiriti o Waitangi mo Ngapuhi i runga i te tika me te pono.
Koia taa Pita Tiipene o Ngati Hine mo te whakautu a te Karauna ki te puurongo a te Taraipiunara o Waitangi araa no te Karauna te tino rangatiratanga o Aotearoa ahakoa te Taraipiunara korero kiihai nga rangatira o Ngapuhi i tuku to ratou rangatiratanga ki te Karauna i te tai 1840.
Hai taa Tipene ano kua pai te mahi a Chris Findlayson Minita Take Tiriti engari te ahua nei e tiitaha ana tana titiro ki nga tono a Ngapuhi.
Copyright © 2014, UMA Broadcasting Ltd: www.waateanews.com