November 28, 2014
Auahi kore, he moemoea.
Auahi kore, he moemoea.
He moemoeaa noa iho te mahere kia noho auahi kore a Aotearoa i te tau 2025.
Koia te korero rangahau o te wa me te matapae ka momi paipa tonu te tangata a nga raa e tuu mai nei ahakoa te piki o te taake ki te tuupeka, ko te utu nui, ko nga pouaka momore, ahakoa te aha me kii.
Kaati he karanga kino tera ki nga taringa o nga roopu aukati kaipaipa ma ratou e titiro ana ki a ratou rautaki mo te whakakorenga o te paipa, o te tuupeka.
Te puurongo tuukinotanga.
E tautoko ana te Paati Maori i nga tohutohu matua kua puta mai i te puurongo a te pakirehua e kiia nei ko te Glenn Inquiry mo te tuukinotanga i nga whaanau.
Hai taa rangatira takirua a Te Ururoa Flavell ka tautoko i te karanga ki te whakarite he Minita Take Tuukinotanga ki nga Whaanau.
Ma reira hai taa Flavell ano ka huri te taiao ki nga haapori kia kore rawa e whakaae ana ki te tuukinotanga.
Mahi nui
E whakapau kaha ana te Maori ki te aarai i te whakamomori ki nga haapori.
Ono tekau maa toru nga roopu Maori Pasifika kua whiwhi i te puutea tautoko a te Tari Hauora ki te whakatupu rautaki.
Hai taa Maapihi Raharuhi kaiwhakahaere o te Waka Hourua tetahi hootaka aarai whakamomori kei te kite nga haapori i o ratou ake rongoaa ki nga raruraru aa e whakarite ana ratou
i nga hootaka rerenga kee me te hokinga ki nga ahuatanga ngaawari, ki nga ahuatanga waiwai.
Kaimahi Hauora
Na te tupu haere o nga Maori e uru atu ai ki nga mahi hauora kua tupu hoki ko te hiahia ki nga karahipi mo o tatou tauira.
728 nga karahipi kua tohaina i tenei tau e te tari hauora kia whakarahi ake i te maha o nga kaimahi Maori.
Hai taa Minita Hauora a Jonathan Coleman tokomaha ake nga Maori kua whai waahi ki nga tukanga whiriwhiri whakatau mo nga take o te hauora he mea tino nui tera kia mauritau nga ratonga Maori.
Penehiini, e hia te utu?
Kua heke ano te utu o te penehiini i te rua heeneti.
Rua taara rima heeneti te utu o te hinu 91 te utu paapaku rawa o te tau.
E matapae ana te roopu motukaa o te AA ka heke ano te utu o te penehiini me te tiihara akuanei na te hekenga o te utu ki nga maakete tauhokohoko i taawaahi.
Kaati tekau maa whaa heeneti te rahi o nga hekenga utu katoa i nga wiki e ono kua mahue ake nei.
Te ahu pehea o te reo.
Tera tonu pea ka whakarerekeehia etahi porohanga o te Pire Reo Maori engari ka mau ki tona anga whaanui.
Koia te whakapae a Maarama Fox o te Paati Maori mo taua pire e whakakapi ai te ture o mua i puta rawa mai i nga whakataunga Tiriti o Waitangi.
Ma te pire hou nei ka hanga i te roopu hou o te Maataawai hai kanohi tirotiro i nga tari kaawanatanga kei te whakaruruhau i te reo i tenei waa.
Hai taa Fox ano me tuku atu i te whakahaeretanga o te reo ki nga iwi ka tika.
Copyright © 2014, UMA Broadcasting Ltd: www.waateanews.com