November 21, 2014
Reiti whenua he huarahi ano.
Reiti whenua he huarahi ano.
Me whakakotahi i nga porohanga whenua Maori kia huamata.
Koia te hiahia o te Kaunihera a rohe o Muriwhenua na te takoto huakore o etahi whenua i te Taitokerau ka noho puuhore aa ko nga reiti anake e tupu ai.
28 miriona taara te nama a reiti o nga whenua Maori i te rohe whaanui heoi ano kei te huri haere te Kaunihera ki te korero ki nga kaipupuri whenua Maori mo te whakaritenga o nga tarahiti whenua hai taupoki i nga taitara nui atu i te kotahi.
Waariu o te Maoritanga.
Aronuitia te waariu o te ahurea Maori i nga waahi mahi.
E whakatewhatewha ana a Raiha Hooker kairangahau Maori i te take ka heke nga kaimahi Maori i a ratou tuuranga mahi.
Ki a ia mehemea ka aro nga kaituku mahi ki te tangata whenua me a tatou tikanga ka rongo tatou i te mahana o taua wairua kua kore e noho taratahi.
Ringa hanga whare.
I runga i nga maataapono tamaiti whaangai kua whai hua te katoa o nga tauira mahi aa rehe Maori i taa ratou akoranga.
Tekau maa ono nga aakonga kua whaangaihia ki nga puukenga hanga whare i te marae o Waiwhetuu Poneke.
Hai taa kaiwhakahaere Teri Puketapu kua hoatu ki nga tauira tekau maa ono te mohiotanga ki te whai waahi ki nga mahinga aa rehe a muri atu nei ko te tiaki aakonga tetahi mea nui.
Whare oranga kore.
Kei te noho whati tata te Maori i o tatou whare taretare.
E mea ana nga kairangahau tirotiro kaupapa whare ko etahi o tatou ka mate na te hanga moorearea o o tatou whare.
Hai taa Ahorangi Michael Baker o te Whare Waananga o Otago e mahue ana te tangata whenua kia tautauaamoa te haere horekau he tautoko.
Ki a ia e tika ana me whakatuu te tari whare i nga kaainga maha ake koia tetahi waahanga o te rongoaa.
Waipareira whai hua.
Kua pai rawa atu te tau oohanga o Te Whaanau o Waipareira ki te uru o Taamaki Makaurau i te tau kua mahue ake nei.
Kua piki nga hua o te puutea ki a ratou, me te rahi o a ratou rawa.
Apiti atu hai taa kaiwhakahaere puutea a Christine Wu horekau he nama.
Ka mutu, kei te rongo hoki i nga painga no te whiwhinga o te kirimana Te Pou Matakana, peka o te kaupapa Whaanau Ora.
Kahungunu aawhina haapori
Kua whakarewa a Kahungunu ki Wairarapa i tetahi hootaka e totoro atu ai ki nga haapori noho tuuwhera.
Ka arotahi taua hootaka ko Te Kupenga o Wairarapa te iingoa ki te hunga kaumaatua, ki nga haapori taiwhenua.
Hai taa Michell Elliot kaiwhakahaere o Te Kupenga.ko te karere nui me mohio te iwi ehara tenei i te ao tumanako kore.
Hai taana ano ahatia ka mahue nga hiahia o nga pakeke ki tenei ao hurihuri na reira e tika ana me whakatau i taua raruraru.
Copyright © 2014, UMA Broadcasting Ltd: www.waateanews.com