December 09, 2014
Maori Pasifika me mahi tahi.
Maori Pasifika me mahi tahi.
E tika ana me whakapaa atu te Maori ki nga mahi i te Moana Nui a Kiwa.
Koia te tumanako o Colin Tukuitonga kaiwhakahaere i nga kaupapa Pasifika hai taana ano ma nga kaupapa Maori ka whai hua te Maori he tauira hoki te kaha o te Maori ki te whakahaere i o tatou ake kaupapa ki nga iwi o te Moana Nui a Kiwa.
Fonterra te iti o te utu miraka.
He kino te korero a kamupene miraka a Fonterra ki nga kaiahuwhenua o te motu.
E matapae ana ratou ka heke ki te whaa taara whitu tekau heeneti ia kirokaramu o nga miraka tuumaaro te utu ki nga kaipaamu he utu ngoikore tera.
Hai taa Fonterra ano ko te iti o te utu miraka puehu huri noa te ao koia te raruraru.
Paipa nga tirohanga o naianei.
Tekau tau, kua pahure atu nei no te waa i aukati ai te momi paipa ki nga hooteera, ki nga paaparakaauta.
Kei te kii tonu etahi kairangahau ka here te maha o te Maori e kaipaipa ana ki te rawakoretanga, ki nga ahuatanga oohanga paapori.
Hai taa ratou ano he raruraru mai tetahi whakatupuranga ki tetahi whakatupuranga ka whai nga tamariki i nga mahi a o ratou maatua.
Kaati ko nga takiwaa pera i a Manurewa Taamaki Makaurau e whakaatu ai te tini manomano o nga Maori e whirinaki ana ki te tuupeka.
Te rerekeetanga.
Kei te patua te tupu oohanga o Aotearoa e nga rerekeetanga i waenga i a rawakore me whai rawa.
Koia tetahi kitenga rangahau o te waa me te karanga kia tika te tohanga rawa me te puutea ki te katoa kaua ki a whai rawa anake.
Kaati e mea ana nga kairangahau mehemea ki te whakakati i nga aaputa rerekeetanga nei ka tupu koe ka rea, ka ora te iwi. Waihoki, e kore ma nga hootaka aawhina e whakatau ai nga raruraru rerekeetanga.
He uaua te kotahitanga.
Ko te whakaritenga o tetahi roopu kotahi ki te kookiri i nga kaupapa Maori kei te whakatairangatia e te Taraipiunara o Waitangi ka kore pea e taea.
Hai taa Haami Piripi tetahi mema o te Kaahui o nga Rangatira a Iwi he whakaaro pai tera engari ka nui te uaua o tera huarahi.
Hai taa Piripi ano he rongoaa te kotahitanga ki nga uauatanga o tenei ao hurihuri kua roa e korerotia ana.
He kaupapa ako.
Kua whakaritea e Hekia Parata Minita Maatauranga tetahi roopu tohutohu ki te aawhina i te ako o nga tamariki nohinohi ki te kura.
Ko Iritana Tawhiwhirangi ratou ko Taakuta Lesley Rameka ko Brenda Soutar etahi o nga mema me te kii a te minita kei nga mema katoa o te roopu tohutohu nga mohiotanga, nga wheeako me nga puukenga
ki te haapai i te kaupapa.
Ka korero te roopu raa i o ratou kitenga ki a Hekia Parata hai a mua i te mutunga o Pipiri 2015.
Copyright © 2014, UMA Broadcasting Ltd: www.waateanews.com