December 05, 2014
Kaunihera
Kaunihera
Mehemea ki te hanga i te tuuru Maori ki runga i nga Kaunihera ka tupu haere te rangatiratanga o te Maori.
Heoi ano ka uu tonu ki te tikanga kia whiriwhiri me kore e whakarite tuuru Maori ia ono tau, ia ono tau.
Hai taa Maarama Fox o te Paati Maori ka kore taua whakaritenga ia ono tau e tuutakitaki i nga hiahia o Ngai Tatou.
I te mutunga ake hai taana ano ka herea nga Kaunihera ki te titiro me pehea tatou e whai kanohi ki nga teepu whai whakatau.
Utu puutea
Akuanei pea ka utua nga roopu tiaki tuuruhi mo te piki ki runga i nga maunga o Taamaki Makaurau.
Ka aukatingia nga motukaa i te haerenga ake ki Maungawhau a tera tau koia tetahi o nga whakatau moata a te roopu e whakahaere ana i nga puia.
Ko Ngaarimu Blair o Ngati Whaatua tetahi mema o te roopu raa hai taana me titiro hoki ratou ki nga hiahia puutea hai whakaora i nga maunga.
Andrew Judd
Kei te whakaririka te koromatua o Ngaamotu a Andrew Judd i nga amuamu a te taha matau mo tana tautoko i te whakaritenga o nga tuuru Maori ki runga Kaunihera.
Hai taa te roopu rangahau take toorangapuu o Aotearoa me heke a Judd i tana tuuranga.
Ka nui te aawangawanga o taua roopu me to ratou kaiwhakahaere a Muriel Newman rangatira tuarua o mua o te roopu ACT.
Ki etahi koia ko te tirohanga kakii whero taa Newman me ona hoa araa ki te Maori me ona wawata heoi ano e kii ana a Andrew Judd e kore ia e heke.
Otautahi
Ko te hokona atu o nga rawa koia anake te huarahi whai oranga mo Otautahi.
Kua whakaaetia nga taha toorangapuu katoa kei reira te ara huamata mo te rohe.
Ka hui nga kaikaunihera o Otautahi i te raa nei ki te matapaki me pehea e utu i taa ratou nama nui tata ki te kotahi piriona taara.
2 ira ono piriona taara te waariu o nga rawa a te kaunihera ka mutu atu i te hokona o te rawa, ka whakaroa pea i te timatanga o etahi hotaka pera i to ratou waahi taakaro hou mo te uniana whutupooro.
Copyright © 2014, UMA Broadcasting Ltd: www.waateanews.com