February 04, 2015
Kore mahi, tuuranga mahi hou.
Kore mahi, tuuranga mahi hou.
Kua piki te maha o te hunga kore mahi ki te 5 ira 7 paiheeneti.
Ahakoa tera tatauranga whaanui he pai te korero i Taamaki Makaurau 20 mano nga tuuranga mahi hou kua hangaia i nga marama e toru i mua atu i te Kirihimete.
Ka mutu e mea ana nga kaiwetewete ka tupu tonu te oohanga o Aotearoa ma te 3 paiheeneti ia tau.
Miraka ko te utu.
Kua hiikina te utu o nga taputapu miraka whai muri i te piki o te utu mo te miraka puehu i te po raa ki taawaahi.
He ngaakau oranga tera mo nga kaiahuwhenua o Aotearoa me te tumanako kua huri pea te tai o te utu iti e taarona haere ai i nga mahinga ahuwhenua huri noa.
Haaunga ano te maroke o te whenua i tenei waa ko te utu o te miraka hoki tetahi raruraru nui.
Kaati koira a Fonterra ka whakakikii i te tukuna o te miraka puehu ki te maakete hokohoko ma reira ka whakapiki i te utu.
Kaakaariki ko te tuuranga, he aha ko te mea nui.
Ki etahi kaikorero me huri te roopu Kaakaariki hai roopu taiao anake.
Koia te karanga a kaioohanga Gareth Morgan whai muri muri te hekenga o Russell Norman rangatira takirua o taua roopu toorangapuu.
Heoi ano kaahore a Meetiiria Tuurei e whakaae ana ki a Morgan me tana whakapae na runga i tona mana puutea e pooheehee ana a Morgan he tohunga toorangapuu ia.
Hai taa Tuurei ano e kore e taea te whakaruruhau i te taiao ki te kore e whakaruruhau i nga haapori kei roto.
Rotorua korero mo te haki
Kua whakahee ano te Kaunihera o Rotorua i te haki tino rangatiratanga kei te tautoko kee ratou i te haki o nga Iwi o Aotearoa me te haki auraki o Aotearoa.
E mea ana te Kaunihera koia hoki te hiahia o nga rangatira o Te Arawa i tenei waa araa kia kaua e whakatuu ko te haki tino rangatiratanga hai whakakapi i nga iwi o Rotorua.
Ka waiho ma te roopu kaumaatua e kiia nei ko Te Puukenga Kooeke o Te Arawa hai whiriwhiri i te tetahi haki kia rere mo ake tonu atu i te raa o Waitangi.
Nga Pou kua pungarehutia.
Ko te tahuna ki te ahi o tetahi pou whakairo i te kura o Whangaparaoa Te Raki Paewhenua i tera wiki, he tohu kino.
Hai taa Peeni Heenare mema paaremata o Taamaki Makaurau na runga i tera mahi nanakia kua whakaaturia kei reira etahi raruraru kua roa e koropupuu ana i taua haapori.
Hai taa Heenare ka rongo i te keha o te kaikiri kaahore ano i whakatauhia.
Flavell: ehara ia i te poutiriao.
Ma wai e whakaruruhau i te Piriimia a John Key i tana whakaekenga ki te marae o Te Tii Waitangi.
I ona raa hai Minita Take Maori ko Pita Sharples tera naana i whakapau kaha ki te tiaki i te Piriimia engari hai taa te Minita Maori o naianei a Te Ururoa Flavell ka waiho ma nga poutiriao o te Piriimia tera mahi ko taa Flavell kee kia whai i te rerenga o te hau otiraa o nga whakaritenga a te Paraire.
Copyright © 2015, UMA Broadcasting Ltd: www.waateanews.com