March 03, 2015
He motika tangata, he tuuru Kaunihera.
He motika tangata, he tuuru Kaunihera.
Kaare he take o tetahi pooti a rohe mo te whakatuuranga o te tuuru Maori ki te Kaunihera o Taranaki.
Hai taa Grant Knuckey i te iwi kaainga i toko ake te whakaaro mo te pooti a rohe i runga i te hiahia ki te mautohe i tetahi tuuru Maori.
Hai taana ano kua whakapaaha kee te Karauna ki te iwi whaanui mo nga muru raupatu o mua te hanga nei kaahore te Kaunihera e aata whakaarohia ana ki nga paanga o taua korero.
He uiuitanga take whare
He aha nga wawata o nga uri o Waikato Tainui e paa ana ki nga kaupapa noho whare, whakatuu whare?
Kua whakaraarangihia etahi paatai ma nga mema o te iwi whaanui hai whakautu.
Ko te paatai hoki me pehea e whakatutuki i nga wawata whare a nga tau e tuu mai nei.
Kua tuku atu he puka paataitai ki nga mema 67 mano o Waikato Tainui ma te waahi ipurangi o te iwi www irakati waikatotainui irakati com
Taamaki utu nui
I te tau kua mahue ake ka nui te piki o nga utu hoko whare huri noa te motu engari ko Taamaki Makaurau kei runga noa atu.
13 paiheeneti te rahi o taua piki i Akarana, tata ki te 7 paiheeneti te piki utu o nga whare huri katoa te motu.
E kii ana nga kaiwetewete oohanga ko te tuuwheratanga o te kuaha o Aotearoa ki te tino manomano o te hunga manene o taawaahi e pana whakarunga ai nga utu kia wera tonu te maakete.
Kaati he wehi no etahi kei pahuu taua maakete hoko whare ki te kore e herea e te kaawanatanga.
Maroke one huakore.
E pakapaka haere tonu ana te whenua i etahi rohe horekau he ua taataa.
Ko te rohe o Waikato kei te paakinotia aa e rongo ana nga kaiahuwhenua i nga paanga.
Na runga i era taimahatanga kei te tupu haere te aawangawanga o nga kaimahi me te kii ahakoa kaakaariki te ahua o te paatiitii he ngoikore te oranga me te huamata o te one na te korenga o te ua.
Maunga waipiro kore, paipa kore.
Kua whakaae te Kaahui Tupuna Maunga o Taamaki Makaurau kia aukati te waipiro me te kaipaipa ki runga i nga puia o te rohe.
E mea ana a tiamana Paul Majurey he kino te ahua me te kitenga o nga toenga hikareti nga keene waipiro me nga paatara e taakotokoto ana i te papa o era tihi maunga.
Hai taa Majurey ano kua whakaae hoki te mana whenua ratou ko te Kaunihera o Taamaki otiraa ko nga roopu whai paanga katoa ki taua aukatinga.
Ka whakatau i te kaupapa here nei ina whakatuu i nga tohu whakamaarama ki runga i nga maunga.
He tirohanga haki hou.
Tera pea ka whakaae te Maori kia whakarerekeehia te ahua o te haki o Aoteroa.
Koia te whakapae a kairangahau Malcolm Mulholland ko ia tetahi o te roopu tohutohu i te huringa o te haki.
Hai taana kua hiikoi kee te Maori i te huarahi ki te whiriwhiri i tetahi haki ookawa mo tatou heoi ana ka waatea hoki te Maori ki te korero i ana whakaaro mo te ahua o tetahi haki hou hai a mua i te whakaritenga o tetahi pooti a motu.
Copyright © 2015, UMA Broadcasting Ltd: www.waateanews.com