March 04, 2015
Matatini, kua rite mai.
Matatini, kua rite mai.
E hia kee nga roopu kapa haka e whaa noa iho nga raa o te whakataetae ko Te Matatini tera.
Kua tiimata i te raa nei taua whakaaturanga motuhake o nga puukenga kapa haka i Otautahi.
Hai taa te toihau o Te Matatini a Darrin Apanui e matapae ana kia toru tekau mano kaimaatakitaki ka kuhu atu ki Hagley Park ka whiriwhiri i nga roopu e iwa ma ratou e whakataetae ki te whiringa toa a te Raatapu.
He kura hourua ano kua tuuwhera.
Kua whakatuuwhera ookawa i te Kura Maori o Waatea i Taamaki Makaurau i tenei ata koia te kura hourua o te waa ki te huaki i ana kuaha.
I reira ko te Minita Maatauranga a Hekia Parata me etahi atu kaitoorangapuu ki te whakanui i te kaupapa.
Hai taana ko te tumanako kia whai hua nga tamariki i raro i te puunaha hou nei me tana kii ko te tautoko me nga tumanakotanga teitei o te haapori, te kaha o te tumuaki me ana kaiako nga mea nunui otiraa kookiritia era ahuatanga kia pakari ai nga tamariki.
Whakatau nui mo Teina Pora
He tika tonu te whakatau a te kaunihera whakawaa kaupapa o te Privy Council ki te taami i te whakahara i a Teina Pora mo te koohurutanga o Susan Burdet i te tau 92 koia taa Metiiria Tuurei o nga Kaakaariki.
Kia whaa wiki te roa ma nga roia o Pora e tuku tono kia whakawaa tuatorutia te kaupapa.
Hai taa Turei ano e tika ana me aata tautoko i a Pora whai muri te 20 tau ki roto whareherehere koni atu i tera me whakarite utu puutea hai hoatutanga ki a ia koia tana akiaki ki te kaawanatanga.
Peters kei te raki.
Kua whakarewa a Winston Peters i tana kaupapa kimi pooti i te Taitokerau i te raa nei.
Ko te taone o Wellsford tana waahi tuatahi me tana mohio tekau nga kaiwhakataetae e nanao atu ana kia riro ma tetahi te tuuru auraki o Northland.
Hai taa Peters i tenei ata e mohio ana nga kaipooti o te rohe kua wareware ratou i nga kaiwhakahaere i Poneke.
Hei aha i a Winston.
E kore au e noho ki te taha kia waatea te huarahi mo Winston Peters.
Koia te korero a Willow Jean Prime kaiwhakataetae o Reipa i te pooti ohorere mo te rohe auraki o Northland.
Na te kuhuna o Peters ki te whakataetae nei e kaikaa ana a Prime ki te totoro atu ki nga haapori katoa.
Kaati kua hiiko ia i te huarahi paatoto kuaha no te waa i heke ai a Mike Sabin o Naahinara mo nga take whaiaro i te marama o Hanuere.
Kauhoe, kia tuupato nga tuuruhi.
I tera wiki ko nga tuuruhi hautuu motukaa te aawangawanga i tenei wiki ko nga tuuruhi e kautaahoe ana i nga moana ki te takiwaa o Rotorua te tirohanga.
Kua kaaewaewa etahi ki nga waahi moorearea kei reira nga kaipuke me nga kaireti wai.
Kua huri te Kaunihera a rohe o te Waiariki ki te tuku i a ratou kupu whakatuupato ki nga tuuruhi.
Ko te raruraru kaahore etahi o ratou e pai ana ki te paanui i nga tuhinga reo Paakeha.
Copyright © 2015, UMA Broadcasting Ltd: www.waateanews.com