March 17, 2015
He manu paakaukau mo te katoa.
He manu paakaukau mo te katoa.
Ko te hiahia o te nuinga o Ngaapuhi kia kotahi te whakataunga o nga kaupapa Tiriti o Waitangi.
Hai taa Sonny Tau te tiamana o Tuuhoronuku te roopu e aata whakarite ana i te korerotanga o nga tono akuanei ka whiriwhiri i nga kaiwhakarite e toru ma ratou e whakaraarangi i nga hiahia o tena hapuu, o tena hapuu.
Kaati kaahore ratou e tatari ana ki te puurongo a te Taraipiunara o Waitangi mo te tuuranga o Tuuhoronuku i roto i te tukanga whakataunga.
Hai taa Tau ano kua whakaritea he tuuru mo Ngati Hine i runga o Tuuhoronuku aa ka waatea hoki a Ngati Hine ki te tiipako i tetahi kaiwhakarite korero.
Tukua ki nga haapori.
Ma wai e whakahaere i nga rawa hai aawhina i nga haapori, ma nga haapori ano, ma wai atu?
20 miriona taara i whakaritea ki nga hootaka haapori whakatuutuu whare ma te roopu Pou Matakana a Whanau Ora engari ma te Puni Kookiri kee e whakahaere.
Koia te whakatau a Te Ururoa Flavell Minita Whanake Maori.
Heoi ano hai taa Taariana Tuuria Minita Whaanau Ora o mua ka waiho kee ma te Puni Kookiri he tari kaawanatanga ki te whakahaere i nga pewheatanga katoa kaahore ia e whakaae ana ki tera.
Wharekauri motu hauhau
E whiitiki ana te motu o Wharekauri Reekohu i a ia mo te kaha o te aawha e kiia nei ko Pam.
Kua tae kee ona paanga ua taataa ki reira me te hau puukeri koni atu i te kotahi rau kiromita ia haora te tere.
E kii ana te haukaainga ehara i te mea e tae ohorere ana taua huripari ki a ratou atu i te tera he waahi a Reekohu kei te waia ki nga paanga o Taawhirimaatea.
Taaria te waa mo te korero.
I etahi waa kaahore e pai ana kia korero wawe i nga kaupapa tautohenga.
He mahi tika taa te Piriimia a John Key kiihai ia i maurirere ki nga whakatuma whiu paitini ki te miraka o nga peepee i tera wiki.
Koia te kupu whakamihi a etahi kaiwetewete kaupapa me te kii e tika ana i etahi waa me tatari kia whakaputa mai nga korero taimaha kei aawangawanga te iwi mo te kore noa iho.
Ahatia nga korero e meingatia ana ka koropupuu tonu te take paitini nei mo tetahi waa.
Tuuru Maori
I te raa nei, ka puta te whakatau te kaunihera o te Hiku o te Ika me kore ratou e whakatuu i tetahi tuuru Maori motuhake.
Hei taa te koromatua o te Hiku o te Ika ma te haapori te whakatau whakamutunga e whakarite mo tenei take.
Mena ka whakaae ngaa kaipooti ki tenei kaupapa, ka aata arotake te kaunihera te maha o ngaa tuuru Maori motuhake me te maha o ngaa kaikaunihera.
Ka aukati te waa tono a te 12 karaka i te raa nei.
Hao ika
Kua hanga i tetahi roopu tuumahi ki te wetewete i nga tohutohu mo nga anga hao ika Maori.
Tokoiwa nga taangata kua whakaritea ki taua roopu no nga hau e whaa.
Hai taa Jamie Tuuta te tiamana o te roopu tuumahi ko te arotahi kia whakamohio atu ki nga iwi nga paanga o nga tohutohu ki a ratou me a ratou rawa hao ika.
Hai te tuawhaa o Pipiri ka pooti nga iwi mo te whakaaetanga, mo te whakaheenga ranei o nga tohutohu.
Copyright © 2015, UMA Broadcasting Ltd: www.waateanews.com