March 20, 2015
Te whakahokihanga o nga moana whakairo
Te whakahokihanga o nga moana whakairo.
E rima nga moana whakairo i haria pokanoatia ki taawaahi whaa tekau tau ki muri kua whakahokohia ki te marae o Owae i Waitara i tenei ata.
Ko Motomui te iingoa o aua moana.
I hokona nga moana raa i tera tau hai waahanga o te whakataunga Tiriti o Waitangi a Te Ati Awa i tera tau.
Hai taa Ruakere Hond e whakaatu ana nga whakairo nei i te whakapapa o Taranaki aa i iri ki te paatuu o tetahi paataka.
E whakapae ana ka hunaia nga moana whakairo ki te repo i te tau 1820 i te hekenga o Te Atiawa ki te tonga.
Ka mutu ka whakaatu i nga moana ki te Whare Taonga o Pukeariki i Ngaamotu.
He piki tatauranga i Aotearoa.
Kua piki te tatauranga o te hunga manene e taetae mai ki Aotearoa ki taumata tiketike.
55 mano taangata te maha o taua piki tatauranga i te tau kua mahue ake nei no India, Haina, Piritana me te Phillipines te nuinga kua piki maarika hoki te maha o nga aakonga whai maatauranga.
Kaati, koia te kaupapa a te Kaawanatanga ki te whakapiki i te maha o nga taangata kei konei e noho ana ma reira ka haapai ake i te taha oohanga o Aotearoa koia te matapae.
He nui nga uauatanga puutea a etahi kaiahuwhenua.
E rongo ana nga kaiahuwhenua o Aotearoa i nga taimahatanga mo te taha ki te puutea ka herea ratou e te iti o te tukuna puutea ki a ratou i tenei tau me nga utu maakete.
Koni atu i tera ka rongo etahi i nga paanga o te maroke me nga rangi ua kore.
Kaati kei te whakahaere rangahau te Whare Waananga o Lincoln kia maarama mohio nga kaiwhakahaere paamu e peehia nei e te nama nui me pehea e whakapai ake i a ratou tikanga whakahaere katoa.
Ka kati pea i te aaputa hauora.
E toru nga whare hauora e whakarite ana ki te whakamaatautau i nga kaumaatua kuikuia mo te maauiuitanga puru toto e kiia nei ko abdominal aortic aneurysms.
Te hanga nei ka paakinotia te Maori e taua mate.
Ka tirohia nga Maori neke atu i te 55 tau te pakeke ko te tumanako kia roa ake te oranga o te Maori mehemea ki te aata rangahau i tenei kaupapa hauora.
Kaua e tango i to tatou whanga.
Kua tuu nga kaipakihi, nga heremana, nga kaiwaiata rongonui, nga kaitaakaro rongonui, me nga kaiako rongonui ki te whakahee i te mahere a te kamupene Ports of Auckland ki te whakawhaanui i nga tauranga kaipuke taha moana.
Ko te tikanga kia tango i nga heketea e toru o te takere moana.
Kaati ko te karanga a te hunga whakahee e kii ana kaua e taahae to tatou whanga o te Waitemataa.
Ka tuu tetahi poroteehi a te Raatapu ki te waapu o Queens Wharf.
Te whakarewanga o Te Aho Matua hai marautanga.
Haramai te ahua o tetahi marautanga motuhake mo nga kura kaupapa Maori.
Koia te mihi a Hekia Parata Minita Maatauranga whai muri te whakarewanga o taua kaupapa.
I whakaritea te Marautanga o Te Aho Matua i raro i te mana o te runanga o nga kura kaupapa Maori i roto i nga tau e toru.
Hai taa Parata ano taapiri atu ki nga painga o te marautanga ko tetahi mea nui ko te matatau o nga kura maahita ki te whakaako tamariki.
Copyright © 2015, UMA Broadcasting Ltd: www.waateanews.com