April 09, 2015
Tautokohia te iwi moemoeaa.
Tautokohia te iwi moemoeaa.
Ko te taamitanga o te iwi moemoeaa i tenei waa tonu kei te whakaroa i te mahi a Ahitereiria ki te kahakii i to ratou iwi taketake.
Koia te tirohanga a Meetiiria Tuurei rangatira takirua o te roopu Kaakaariki e paa ana ki te hiahia o te kaawanatanga o tera whenua kia kore e utu i nga ratonga tuuturu ki nga haapori paamamao o te iwi raa.
Hai taa Tuurei ano he taapiritanga te kaupapa nei o te mahi a nga kaawanatanga o mua o Ahitereiria no reira ka whai waahi ia ki te hiikoi whakahee a te tuatahi o Haratua ki te poroteehi i te whakatau kia peia te iwi moemoeaa ki waho o o ratou rohe tuuhaahaa.
Taranaki whakahee.
E rongo ana i te hoihoi o te reo a te Maori kia tautoko i te oke mutunga korero o te iwi moemoeaa o Ahitereiria.
Ko nga Maori o Taranaki kei te whakahee i nga mahi a te kaawanatanga i reira ki te pana atu i nga iwi kaainga kia whakareerea o ratou haapori paamamao.
Hai taa Taakuta Leonie Piihama ki te kaawanatanga o Ahitereiria kaati to koutou pena kaua hai whakaroa i te tuukino ki te iwi raa, kaua hai whakaroa i te mamae.
Nga tirohanga ki nga whakahaere mo te reo Maori.
Kua whakaraarangi te Komiti Whiriwhiri Maori o Paaremata i nga ahuatanga o te reo Maori hai tirohanga atu ma te Minita Whanake Maori, ma Te Ururoa Flavell.
Hai taa Flavell e pai ana te haere o nga mahi a tana roopu tohutohu o te Maataawai ahatia nga korero a te Komiti Whiriwhiri kei te anga whakamua tonu a te Maataawai araa e taatari ana i nga anga, i nga tauira, i nga honoga e whakaawe ai te tupu o to tatou reo. Ka whakatakoto i o ratou kitenga ki mua i te Minita a nga marama kai te haramai.
Kiwa, he kamupene kei te nanao atu ki taawaahi.
Ka huri te kamupene Maori o Kiwi Digital ki te whakarato i nga pakiwaituhi ki nga waea puukoro i te reo Hainamana. He whakaritenga tera ki a kamupene pouaka whakaata Beijing Kaku o Haina.
Ka whakamahi a Kiwa i o ratou haangarau tiketike ki te whakaniko i taua ratonga.
Kua hainatia te kirimana i waenga i a Kiwa me Beijing Kaku ki Shangahai inanahi i reira a Steven Joyce Minita Whakatupu Ohanga.
Ko te kaupapa kia whakatairanga i nga pukapuka matihiko araa digital books.
Rotorua whai maatauranga.
He whakaaro pai te whakaroanga o nga whakamaatautau hai hanga i nga huarahi hou mo te tohanga o te puutea whakangao a te kaawanatanga. Koia te korero a Te Taumata o Ngati Whakaue Iho Ake o Rotorua.
Tekau maa ono nga whakamaatautau kei te whakahaerehia ki nga haapori huri noa ko nga kaupapa maatauranga te arotahi i Rotorua.
Te whakakotahitanga pea o nga iwi.
He taputapu nui te reo o te tangata.
Waihoki e mea ana etahi Paakeha ma te ako i te reo Maori ka whakakotahi i nga iwi katoa o Aotearoa.
E tupu haere ana ko te whakapono kaahore he kino pena ako ai te tangata i tetahi atu reo.
Kua huri te whakaaro o te tokomaha i enei raa me taa ratou kii me mahue ki muri te whakapae ko te reo Maori tera kei te whakawehewehe i nga iwi horekau he tika o tera korero.
Hai taa Roana Bennett te toihau o Ngati Whakaue Iho Ake ko tetahi o a ratou whaainga hai whakapai ake i nga hononga ipurangi ki nga tauira ako o to ratou rohe ma reira ka maamaa ake te paanga ki nga rauemi ako kei runga rorohiko e putu ana.
Copyright © 2015, UMA Broadcasting Ltd: www.waateanews.com