April 07, 2015
He tohu reo mo Waikato.
He tohu reo mo Waikato.
I tenei ahiahi kua whakanuia te ahua o to tatou reo a tuhi a korero i whakaaturia ai ki Te Matatini 2015.
Ko Mootai Tangata Rau o Waikato te tino tangata o te tau kua whiwhi te kapu kairangi mo te ahuatanga o te reo.
Hai taa maangai korero a Paraone Gloyne he hoonore nui ki te tangata tera o nga tohu aapiti atu he tirohanga hoki ki te hiranga o taua taonga, o te reo i tenei ao hurihuri.
He kainga mo nga kaitaapere Maori.
Kua whai kaainga nga kaitaapere Maori ki te whakaatu i nga mahinga whakakite ki runga atamira.
Ko Ruia Taitea te roopu kua whakaritea e nga kaitaapere 30 me te hunga tautoko ko Titirangi Taamaki Makaurau to ratou kainga hou.
Ka whakarewa i te whare taapere hou hai te mutunga o tenei wiki.
Hai taa kaitaapere Maori a Tainui Tuukiwaho koia te huarahi tika araa ko te whakatuu kainga mo ratou kia taea ai e nga kaiwhakakite Maori te tuu ki te whakaatu i o ratou puukenga whaanui.
Ka noho ki hea?
Kaua hai utu i te hiahia o te iwi moemoeaa ki te noho ki nga haapori paamamao i Ahitereiria engari me tapahi i te puutea tautoko.
Koia te whakahau a Tony Abbott Piriimia o te whenua raka me tana mahere kia aukati i nga ratonga ki aua haapori.
Heoi ano hai taa Te Ururoa Flavell Minita Take Maori e tautoko ana ia i te tohe a te iwi taketake o reira na reira me waiho te iwi raa ki taa ratou e pai ai pena hiahia ratou ki te noho i o ratou ake whenua e pai ana.
aiwhakawaa puukenga nui, kua hinga.
Kua mate ko tetahi o tatou e maumaharatia ai e tatou mo tana tuu tiketike i te ao o te ture ko kaiwhakawaa Maori a Mick Brown tera 77 ona tau kua tanumia i te raa nei i Taamaki Makaurau hai taa kaumaatua Bob Newson i kaha te kaumaatua raa ki te arataki i nga whaanau Maori ki te whakatere i nga aarai o te ture, kia whakaorangia nga rangatahi kiihai i whakaaetia ko te whareherehere te waahi tika mo te nuinga.
Heoi ano te matua Mick takoto mai i to moenga roa, takoto mai, moe mai raa.
He hui rangahau mo iwi taketake a te Pipiri.
E rite mai ana nga kairangahau iwi taketake o te ao mo te tuarua o nga hui He Manawa Whenua te iingoa.
E mea ana a Leonie Piihama kaiaarahi o te roopu rangahau o Te Kotahi i te Whare Waananga o Waikato hai te mutunga o Pipiri ka tuu hoki ko etahi waananga kia tohatoha i nga moohiohio ka kohikohia e ratou.
Hai taa Piihama ano ina pupuu ake nga hua o te whenua otiraa o te rangahau ka tautoko i te tupu o iwi taketake huri noa ka mutu ka hau mai nga kaikorero o taawaahi ki te whakatakoto i nga whakaaro o iwi taketake, kia whai oranga tatou.
Tirohia nga taimahatanga paapori.
He aha nga paanga ki te Tiriti o Waitangi ki te arotake, ki te whakahou i te tari whakaruruhau tamariki o CYFs?
Koia te paatai a James Makowharemahiihii o te Uniana Kaimahi Paapori waihoki ko taana ano ka uu tonu te kaawanatanga ki te kaupapa o te mahi kaahore ranei?
Hai taana ano ahakoa te maha o nga arotake i roto i nga tau e tohua ai ki te iti o nga rawa tautoko he koopaka tonu o te rawa otiraa o nga mea hai tautoko i te tiakitanga o nga tamariki noho tuuwhera.
Ki a ia he iti tonu te reo o nga kaimahi Maori ki nga whakawhitinga korero e paa ana ki a CYFs.
Copyright © 2015, UMA Broadcasting Ltd: www.waateanews.com