May 12, 2015
Kua raukotingia te kaupapa nui.
Kua raukotingia te kaupapa nui.
E ai ki tetahi puurongo mo Whaanau Ora kua raukotingia taua kaupapa whakahirahira e nga minita kaawanatanga.
I taautuhia e te Tari Arotake te hee o nga whakautu a nga tari kaawanatanga ki te whakaaro kia mahi tahi nga ratonga aawhina me te aro atu ki te whaanau kaua ranei ki te tangata kotahi anake.
Hai taa Louisa Wall o Reipa i whakamoemiti te Tari Arotake ki a Whanau Ora me ona painga hou.
Hai taa Wall kia maarama ake te kaawanatanga ki te korero i ona tumanakotanga mo Whanau Ora.
Ahatia e kii ana a Wall he tino pai te mahi a nga kaiwhakahaere, a nga kaimahi kei te aarahi i te anga whakamua o nga whaanau.
Rotorua kaupapa Maori, kaupapa Kaunihera.
Ko te anga mahi tahi kei te korerotia e Te Arawa te ahua nei koia hoki te hiahia o te Kaunihera o Rotorua.
Kua whakakaahoretia e te Kaunihera te hiahia kee ki te whakatuu i nga tuuru Maori.
Hai taa Koromatua Steve Chadwick i whakaae te katoa o nga kaikaunihera i tera tau ki te mahue nga tuuru Maori ki roto i a ratou.
Te tikanga kei mua i te aroaro kia taautu huarahi te kaunihera ki te tuutaki i ana here a ture mo te paanga o te Maori ki nga tukanga whakatau.
Nga korero mo te haki.
He tauira Maori etahi tono mo te haki hou o Aotearoa.
Ko te marama o Akuhata te waa kati kia whiriwhiri te poari tekau taangata i nga tauira e whaa hai pootitanga tuatahi ma te motu.
A muri atu ka whakatuu i te tauira toa ki te taha o te haki o naianei kaatahi ka pooti ano te motu kia kite ko tehea e paingia ana hai haki hou.
Hai taa Malcolm Mulholland maangai korero o te waa ka tiimata akuanei ko tetahi whakaaturanga haere huarahi ki te whakamoohio mai i te tukanga tiipako haki kei te whakahaerehia.
He whakaaturanga puumanawa.
Ko etahi puukenga puuoro kaahore e pai ana kia hunaia.
Koia te korero a Ngaatapa Black kaihautuu o te hootaka hou ki runga i a Waatea i nga poo Tuurei mai te paaparakaauta o te Black Note Bar i Taamaki Makaurau.
Ka whakapaahotia te hootaka puuoro nei ki nga reo irirangi o te motu ka tukua hoki ki te ipurangi.
Hai taa Ngaatapa kei te rongohia nga kaiwaiata puumanawa me te tupu o nga puukenga puuoro.
Hai te waru karaka a te po nei ka rongo i te reo waiata o Ants Pirihi me tana tuu takitahi ki runga i a Waatea.
Kaunihera Maori
Hei te mutunga o tenei marama ka matapaki te Kaunihera Maori i nga kaupapa nui o te waa ki te Papaioea.
Ko te mana whakahaere, ko te paanga o te Maori ki nga take huhua me te paanga o te Kaunihera ki nga hapuu ki nga iwi ki nga roopu Maori a taone a taiwhenua ka korerohia.
Hai taa Maanu Paul tiamana takirua o te Kaunihera Maori ka korero nga rangatira a hapuu a iwi ki te whakaminenga.
Hai taana ano kei te rapu rautaki korero mo te kuhuna o te Maori ki nga taumata kaawanatanga katoa o Aotearoa.
Me whakapai ake i nga puukenga reo katoa.
Kei te haere tonu nga whakawhitinga korero mo tetahi rautaki whaanui e paa ana ki te aheinga o te Maori ki nga puukenga a paangarau, a tuhi, a paanui, a korero.
E kii ana nga kairangahau he mea nui kia whakapai ake i te matatau o te Maori ki era ahuatanga.
Ka whakahaere hui ki te matapaki i te kaupapa nei ki Otautahi ki Tuuranga ki Whaangarei ki Rotorua hai te wiki whakamutunga o tenei marama.
Hai taa Keith Ikin maana te tukanga whakawhiti korero e aarahi mo te Kaunihera Rangahau Maatauranga he kaupapa tenei e paa ana ki te oranga o te motu katoa.
Copyright © 2015, UMA Broadcasting Ltd: www.waateanews.com