May 05, 2015
Kaua e hoko whenua
Kaua e hoko whenua
Kua haina kirimana tetahi kamupene o Haina ki te hoko etahi paamu i te Taitokerau $42m te waariu o nga paamu.
Koia nga hoko o te waa a Haina me te hiahia o tera whenua ki nga rawa a Aotearoa.
Ko Huanan Dakang te iingoa o te kamupene raa, wai hoki horekau he korero a te Tari mo nga Whakangao a Taawaahi mo te hokona nui nei.
Heoi ano hai taa Wayne Brown koromatua o mua o te Kaunihera o te Raki, kaahore ia e pai ana kia hoko atu i o tatou paamu ki nga kaiwhakangao o taawaahi.
Tainui kei runga
Na te kaha o Tainui ki te whakatupu i te puutaketanga a pakihi o a ratou rawa oohanga, kua whakaiingoatia to ratou ringa pakihi te tino tauira mo te arataki pakihi i tenei tau.
Koia te tohu tiketike i tukua ki te roopu i nga tohu pakihi Maori i nga raa whakataa. I whakanuia hoki ko Kiingi Smiler o Ngati Kahungunu me Te Aitanga a Maahaki te tiamana o Wairarapa Moana, te tino rangatira pakihi o te tau.
Kaati ko Ngaarimu Blair o Ngati Whaatua o Oraakei ratou ko Mavis Mullins o Aatihau Whanganui, kairangahau Ella Henry, ko kaipakihi Melanie Smith etahi atu i whakahoonoretia.
Tikanga Haumaru Huarahi
Ko tenei wiki e whakatairanga ana i nga tikanga haumaru ki nga huarahi aa, e arotahi ana te AA me te Manatuu Waka ki te oranga o nga tamariki.
E kii ana nga roopu nei me aata haere, me mataara hoki nga kaihautuu waka i nga waa e paatata atu ai ratou ki nga kura, ki nga pahi kawe tamariki, kia tika te herenga o nga tamariki ki nga waka, tukua nga tamariki ki te taha o te huarahi kei reira te kura e tuu ana, kia tuupato ki nga mahi a nga tamariki i nga ara taraiwa ki to kainga, ki hea ranei.
Hai taa nga roopu waka nei…mehemea ki te aro nga kaihautuu waka ki nga tikanga haumaru nei, ka whakaheke haere i te maha o nga patunga tamariki ki o tatou huarahi.
Nga Tauira Neehi Maori
Ko te whakaritenga o te ahurea auahi kore, ko te rangatiratanga o nga waahine, ko te aarai i te whakamomori, koia etahi o nga tino kaupapa hai korerotanga ma te hui o nga Neehi Maori kua tiimata i te raa nei.
Neke atu i te rua rau nga neehi, nga kaumaatua, nga kaikauhau me nga tauria neehi o nga rohe katoa kua tatuu ki te hui e whaa rangi te roa ko te Hui a Tau o Nga Tauira Neehi Maori te iingoa.
Hai taa kaiwhakahaere Evelyn Hikuroa ka noho tahi nga ringa mahi katoa ki tetahi taiao Maori ki te korero i nga kaupapa whakahirahira o te waa.
He Aituaa
Kua hinga a kuia Henrietta Maxwell o Ngati Porou.
Ko ia tetahi o nga kaihaapai o te Kohanga Reo me Te Ataarangi i ona raa.
Hai taa Peeni Heenare o te Roopu Reipa, e kore e wareware i a ia te piripono o te kuia raa ki tona reo rangatira.
Me te kii ka tuu tana hui mate, ko tana tangihanga ki Wainuiomata Te Whanganui a Tara.
No reira e te whaea takoto mai, takoto mai, moe mai raa.