May 06, 2015
Whareherehere waea, rorohiko.
Whareherehere waea, rorohiko.
Tera tonu pea ka whakauru i nga waea me nga rorohiko ki nga ruma o nga mauhere mehemea ka whai hua taua tikanga e whakamaatautauhia ana ki te whare herehere o Wiri.
Ka whakarite te kamupene whakahaere whare herehere o Serco i nga waea ka whakatiki i nga nama e taea ai te waea atu me nga rorohiko mo te ako, mo te whakatupu puukenga ka aro nga kaiwhakahaere ki nga mea katoa.
Te tikanga ma nga waea me nga rorohiko ka whakamaamaa i nga taimahatanga e pepeehi ai i nga mauhere.
Whaanau Ora, he moemoeaa.
I hangaa te kaupapa o Whanau Ora me te korenga o nga taunaki korero ki te tautoko i tana whakatuuranga.
Koia te whakautu a Winston Peters rangatira o Aotearoa Tuatahi ki te puurongo a te Tari Arotake kua taautuhia etahi ngoikoretanga ki nga whakahaere a Whaanau Ora.
Hai taana ano, he moemoeaa a Whaanau Ora i whakaarahia e te Paati Maori kaahore e maarama ana nga whaainga o te kaupapa.
Aawha i te Tonga
Kaua e whakairi kaakahu ki waho he kino nga paanga huarere.
Koia te tohutohu ki nga rohe maha o te Waipounamu me te tonga o te Ika a Maaui.
He ua taataa, he hau kino te korero 130 kiromita te tere o te hau ki te tuawhenua o Waitaha i tenei ahiahi.
Heoi ano, ka rongo i te mahana ki te Papaioea, Ahuriri, Tauranga, Kirikiriroa me Taamaki Makaurau.
Tatauranga Kore Mahi
5 ira 8 paiheeneti tonu te tatauranga o te hunga kore mahi i Aotearoa na te maha ake o nga taangata e rapu ana, e kuhu atu ana ki nga tuuranga mahi.
I te tau kua ngaro nei kua piki maarika te maha e mahi ana i te 74 mano taangata kua heke i te kotahi mano te tatauranga kore mahi.
Ko Taamaki me Otautahi nga waahi kei te tupu matomato me te rahi o nga tuuranga ki era rohe.
Puurongo Rena
Kua taangia e te Taraipiunara o Waitangi taa ratou puurongo whakamutunga e paa ana ki te kaipuke Rena.
E whakaae ana te Taraipiunara ki te tirohanga a nga roopu iwi kainga me tango atu i te paenga o taua waka kei te raarangi toka o Otaaiti e takoto tonu ana.
Kaati ki nga kitenga i hee te huarahi whakatau i whaaia e te Karauna waihoki kiihai te tangata whenua i aronuitia mo te taha ki te whakawhiti korero.
Kua tohungia te Karauna kia whakaruruhau i nga motika Maori ki roto i nga tukanga whakawhiti korero katoa.
Reo Maori ka rangahaua.
Ka rangahau te Kaunihera Rangahau Maatauranga o Aotearoa i te hauora o te reo Maori.
Rua tekau marama te roa o te hootaka e kiia nei ko Te Ahu ot e Reo, ma te Taura Whiri i te Reo Maori e kookiri.
Hai taa Poia Rewi te toihau o te waa o te Taura Whiri .ma te rangahau nei ka mohio me pehea e whakamahi mauritau i nga rauemi ki te tautoko i te whakaoranga o te reo.
Ko te hiahia o nga kairangahau kia mohio ai me pehea nga kaainga me nga haapori e whakatinana ai i te reo kia ora tonu.
Copyright © 2015, UMA Broadcasting Ltd: www.waateanews.com