May 14, 2015
He waa hou, he huarahi whai hua.
He waa hou, he huarahi whai hua.
Ka whakapuare ano Te Kura Whakapuumau i te reo tuuturu ki Waitaha i ana kuaha ki tetahi huarahi hou apopo.
Na runga i nga paanga kino o te ruu whenua i te 2011i huunuku atu Te Kura Whakapuumau ki waahi kee he kura ano i whakareerea i te rohe o Linwood.
I muri mai i mate to ratou tumuaki.
Heoi ano kua huri te tai ki te tika me te aawhina o nga roopu maha.
Hai taa Tihi Puanaki kaihaapai o te reo Maori kei Otautahi e noho ana he nui te tuuranga o nga kura pera i Te Kura Whakapuumau ki te orangatonutanga o to tatou reo me te kii a nga kairangahau e tika ana kia 20 paiheeneti o nga tamariki neke atu ranei e korero ai i tetahi reo ma reira ka ora.
Haahi whakaaturanga ki Kirikiriroa.
Ka tae ki nga kainoho o Kirikiriroa a enei rangi whakataa ko tetahi whakaaturanga motuhake o te haahi Ihirama.
He whakaaturanga tera o to ratou pukapuka tapu o te Koran me nga tauira maha i whakamaoritia ki nga reo 45 o te ao ko to tatou reo rangatira tetahi.
Hai taa Mohammed Iqbal peretini o te haahi Ihirama i Aotearoa te tikanga kia kite nga iwi o tenei whenua i nga painga i nga hua nunui o te haahi kaua ranei ko nga ahuatanga kino e korero whaanuitia ana i tenei waa.
Kia mataara te Maori.
Kia tuupato ki nga taimahatanga kaahore e kitea ana mo te hootaka hoko whare a te kaawanatanga.
Koia te korero a Nanaia Mahuta o Reipa ki nga iwi e paa ana ki te kaawana hiahia ki te whakamaatautau i ana mahere ki te whakarerekee i nga tikanga whakarato whare araa kia hoko atu i nga whare rua mano ki nga iwi me nga ratonga whare i Tauranga me Waihoopai.
Hai taa Mahuta ano ka whakamihi atu ki a Nga Pootiki o Paapaamoa Tauranga mo te kaha o to ratou hiahia ki te aawhina i o ratou uri.
Tatauranga tohu maatauranga.
Kua piki haere te maha o nga Maori i oti i a tatou he tohu ookawa i tetahi whare waananga, kuratini ranei.
60 paiheeneti o tatou i te tau 2006 i mau tohu ookawa, i te tau 2013 i piki taua kaute ki te 67 paiheeneti.
Kua piki hoki ki te 7 ira 5 paiheeti te rahi o te Maori e pupuri ana ki te tohu paetahi araa bachelors degree.
Kaati kua tata ki te 50 oorau o nga tauira Maori katoa i tenei waa kei te rapu tohu, he rangatahi.
Haki taamitanga.
Kia kotahi te pooti hai whiriwhiri i tetahi haki hou mo Aotearoa.
Koia te hiahia o Maarama Fox rangatira takirua o te Paati Maori taa te mea he tukanga kia rua waahanga e whakahaerehia ana e te kaawanatanga kotahi hai whiriwhiri i te tauira pai ake o nga haki hou ka rua ka whakataetaehia taua haki hou ki te haki o naianei.
Ahatia hai taa Fox ano ko te haki o naianei he haki o te taamitanga.
Oraakau, hoki whenua mai.
Kei te harikoa a Kaawhia Muraahi o te roopu Whakaruruhau Puri Mahara i te Pakanga o Oraakau
kua hoko te Karauna i te kauanga riri otiraa te whenua i reira i pakanga ai te Maori ki te Paakeha i te tau 1863.
Hai taa Muraahi ko te hokona o taua whenua te waahanga tuatahi o te mahi kia whakatu i tetahi momo tohu whakamaharatanga ki reira.
Kei nga ringaringa o te Karauna taua whenua mo tenei waa engari ki taa Waikato Tainui i tera tau kia tika te paanga o te Karauna araa hoki whenua mai.
Copyright © 2015, UMA Broadcasting Ltd: www.waateanews.com