June 24, 2015
Me hanga marae.
Me hanga marae.
E hiahia ana etahi whaanau o te Rakipaewhenua Taamaki Makaurau ki te hanga marae te kaunihera kia kore ano ratou e whakahaere tangihanga ki te teeneti, ki te karaati motukaa, ki hea ranei.
Hai taa maangai korero a Te Aniwa Tuutara horekau he marae e tika ana hai tautoko i to ratou haapori.
Hai taana ano ko te ahua nei e tuutakitaki ai te Kaunihera i nga hiahia o etahi atu iwi he peehea hoki o ratou hiahia.
Makariri rawa, kino te koopeke.
E rua nga po makariri kua rongohia e te motu rua tekau whakarautanga raro i te kore te paanga maatao ki te tuawhenua o te Waipounamu e matapae ana pera ano te kino o te koopeke a te po nei.
Kaati e mea ana nga kaipuutaiao e rua noa iho nga waa he penei rawa te makariri i te kotahi rau tau kua pahure atu nei.
Wai maori, whakatikahia.
E tika ana nga korero a te Kaikoomihana o Paaremata mo nga take Taiao araa kei te hee nga whakahaere mo te wai maori.
Koia te tirohanga a te Kaahui o nga Rangatira a Iwi mo te wai maori me te kii a to ratou maangai korero a Roku Mihinui ahakoa te kaupapa here ka puta mai ko nga mahi hai whakapai ake i te ahua o te wai te mea nui.
E kii ana a Kaikoomihana Jan Wright kei te heke haere te painga o te wai na reira me whakamaarama ano ki nga Kaunihera nga tikanga hai whai mo te oranga ake o te wai maori ki o ratou rohe.
Nga Whakaritenga Mahi.
E rapu huarahi ana te roopu whakatupu oohanga o te raawhiti o te Moana a Toi me pehea e hanumi i nga kaimahi huakiwi ki nga mahinga ahumoana ma reira pea ka piki te rahi o nga tuuranga mahi.
Ka nui te hiahia o nga taha e rua ki nga kaimahi i etahi waahanga o te tau te tikanga me whakarite i nga rawa kia pai te whakakapinga o nga mahi katoa i nga waa katoa.
Ahurea Maori, whakatinanahia ki te ao pakihi.
Ki nga kitenga rangahau he mea nui te ahurea Maori kia whakakaha ake i nga pakihi.
E mea ana te korero ka kite nga kamupene e aro ai ki te ahurea i nga hua o tera whakaaro i roto i o ratou paanga ki nga whenua o taawaahi.
Kaati ko taa te tari tatauranga i tenei waa kia hoatu ki nga roopu Maori nga kohinga korero kia pai ake nga whakatau mo te tupu, mo te whakangao.
Miraka utu heke.
Ka piki ka heke ko te utu o nga mea katoa i tenei ao hurihuri.
Ahakoa te hekenga kino o te utu o taputapu miraka ki nga maakete tauhokohoko kaatahi ano ka heke taua utu i o tatou toa.
E matapae ana nga kairangahu oohanga tera tonu pea ka heke haere te utu o te miraka ki te toa ki te kore te maakete whaanui e rewa ake.
Copyright © 2015, UMA Broadcasting Ltd: www.waateanews.com