August 06, 2017
Haere a SOUL ki Geneva
Haere a SOUL ki Geneva
E haere ana a Pania Newton me etahi o te roopu SOUL ki Geneva i te ra nei ki te korero ki Te Whakakotahitanga o te Ao mo te raupatutanga o te whenua i Ihumatao e te Kawanatanga, te Kaunihera o Tamaki me Fletcher Building.
Nga whakataunga tiriti
E tika ana kia arotakehia tonutia nga whakataunga tiriti, ahakoa te tawhito mai, ahakoa te hou mai. Hei taa Jack McDonald o Nga Kakariki, tera pea kua hua ake he korero hou ano e whai waahi ai etahi iwi ki te kokiri tono raupatu ano.
Whakataunga tono raupatu o Te Wairoa
Kei te hui nga uri Maori o Te Wairoa ki te whakarite me te whakatakoto rautaki e pai ai taa ratou whakamahi i te kotahi rau miriona taara ka taka ki o ratou ringaringa i te whakataunga o taa ratou tono raupatu. Hei te marama o Haratua a tera tau, ka tutuki te whakataunga, a, hei taa Leon Symes o Tatau Tatau o Wairoa, e ono mano uri kua reehita ki a ratou i tenei wa nei.
Te Poari Maori o Taranaki
Kei te whiriwhiri nga iwi o Taranaki, me aha e ratou te Poari Maori o Taranaki. No te tau kotahi mano, iwa rau, rua tekau i whakatuuria ai te Poari nei, a, mo nga tau maha, ko taua Poari te pou o nga kaupapa katoa a nga iwi e waru o Taranaki. Heoi, hei taa Wharehoka Wano, tahuhu rangapu o Taranaki Iwi, e rima tau ratou e aromatawai ana mena ra he take tonu o taua Poari.
Whai putea a Tuhoronuku
Kua whai putea a Tuhoronuku i te Runanga o Ngapuhi Runanga kia huri ano i te motu ki te kimi tautoko i nga uri, kia tuu tonu ai a Tuhoronuku hei amo tiitoko i te tono raupatu a Ngapuhi nui tonu. Hei taa te toihau o Tuhoronuku, ki te whai ratou i te tautoko a nga uri, ka hui ano ratou ki te Karuna hei mua i te mutunga o te tau kia kauneke whakamua ai nga korero mo te whakataunga.
Whai pungao hou a Reipa
Kua whai pungao hou a Reipa. Koira taa te mangai torangapu mo Tamaki Makaurau, taa Peeni Henare, whai muri iho i te panonitanga o nga kaiarahi. Kua rere te nui o nga koha ki te roopu i te whakatuunga mai o Jacinda Ardern ki te turanga o Andrew Little. Hei taa Henare, kei te whakaako ia i te reo Maori ki a Ardern, a, e kaha ana ia ki te tautoko i nga kaupapa Maori.
Copyright © 2017, UMA Broadcasting Ltd: www.waateanews.com