September 07, 2017
Te murunga hara o Rua Kenana
Te murunga hara o Rua Kenana
I hui te Minita Whakawhanake Māori a Te Ururoa Flavell me te whānau o Rua Kenana i Rotorua inanahi ki te whakaoti i ngā whakaritenga mo te murunga hara ka utaina atu ki runga i te poropiti nō Tūhoe. Hei te rahoroi nei ka hāere te Minita ki Maungapōhatu, ki te waitohu whakaaetanga e puta ai i te Karauna he whakapaaha, he murunga hara hoki. Hei tā Flavell, kotahi rau tau te whānau e tatari ana kia whakahokia te mana o to rātou tūpuna.
Te taami i ngā keenge
Mena e hiahia ana koe ki te turaki i ngā taniwha pēnei i te taimiri P me ngā taimiri paheko, me turaki i te tuakōkātanga, arā, i te pōharatanga. Koirā te whakahau a Harry Tam o te roopu Mangaru, i a ia e korero ana ki te hui whakapōauau Cutting Edge e tū nei ki Te Whanganui-ā-Tara i tēnei wiki. Hei tāna, ko te kaupapa a te Kāwanatanga hei taami i ngā keenge, he kaupapa e aro kore ana ki ngā take i whānau mai ai ngā keenge.
Tūranga Te Pou Tupua
Kua tohua a Kahurangi Tariana Turia rāua ko Turama Hāwira ki te tūranga Te Pou Tupua, he tūranga e noho nei rāua hei kanohi tangata mō te awa o Whanganui. He tūranga ēnei e hua ake ana i raro i te whakataunga mō te awa o Whanganui, he whakataunga e whakamana ana i te awa anō nei he tangata, he tūpuna. Ko te mahi a Turia raua ko Hāwira, he āwhina i te Tarahiti o te awa ki te tohatoha ki te toru tekau miriona tāra ki ngā kaupapa tiaki, hāpai hoki i te māuri ora o te awa.
Te mana o te wai Māori
Kaore i te pai kia whakatahangia tonutia e te Kāwanatanga te kaupapa mo te mana o te wai Māori. Koira tā James Shaw, kaiarahi i Ngā Kākāriki. Hei tāna, e whakaae ana ngā Kākāriki, he mana motuhake to te iwi Māori ki te wai i raro i te Tiriti o Waitangi.
Copyright © 2017, UMA Broadcasting Ltd: www.waateanews.com