September 19, 2017
Rautaki a Te Taura Whiri
Rautaki a Te Taura Whiri
He rautaki tā te Taura Whiri e kaha ake ai te whai waahi o ngā Pākeha ki Te Wiki o Te Reo Māori kia tipu ai te whakaaro pai me te waiaro pai i waenganui i te marea ki te reo. Hei tā te tāhūhū rangapū o te Taura Whiri a Ngahiwi Apanui, he uara nui , he hua nui tō te akiaki i ngā kaiwhakapaaho Pākeha pēra i a Jack Tame rāua ko Guyon Espiner kia kaha tonu ki te kōkiri me te kōrero i te reo Māori.
Amuamu a nga kaipooti Māori
Hei tā te Komihana Pooti o te motu, ka rangahau hōhonu i te pūtake o ngā amuamu a ngā kaipooti Māori e pā ana ki te hunga e whakahāere waahi pooti ana. Ko te pouako torangapū no Te Kunenga ki Pūrehuroa, a Veronica Tāwhai tētahi kua tuku amuamu ōkawa. Hei tāna, kāore ētahi o te hunga e whakahaere waahi pooti ana, i mōhio he rārangi pooti Māori, kaore e mōhio ana ki te whakahua i ngā ingoa o ngā kaipooti Māori. Hei tā Alicia Wright, ūpoko o te Komihana Pooti o te Motu, kua kōrero rātou ki a Tāwhai, ā, ka mahi nui ki te whakatika i ēnei āhuatanga.
Whakatipuranga hou hei ārahi i a Tainui
E hiahia ana a Tainui kia riro ma te whakatipuranga hou rātou e ārahi ki āpōpō. Koirā tā te toihau hou o Te Whakakitenga o Waikato a Parikawhia McLean. He mea pooti ia ki taua tūranga i ngā rangi whakatā nei, e ngā marae ono tekau mā waru o te rohe o Waikato Tainui. Ko Tipa Mahuta i tohua hei toihau tuarua. Hei tā McLean, ko ngā kaupapa matua kei mua i te aroaro ko te mana o te wai Māori, te whakatutuki i ngā kaupapa pāpori me ngā kaupapa ahurea a te iwi, me te whakatau i ngā kōkōraho tiriti a ngā iwi kei te takutai hauāuru o te rohe e noho ana.
Rongowhakaata ki Te Papa
Hei te Rāmere nei ka riro te mana o te taumata kōrero o Te Papa i te iwi o Rongowhakaata. Ka whakapuarehia hoki te whakaaturanga e pā ana ki a Rongowhakaata, arā, Ko Rongowhakaata: The Story of Light and Shadow. Kotahi rau, rima tekau ngā taonga a te iwi ka whakaaturia mai, arā, ko te pukapuka karakia a Te Kooti, he tokotoko wheua parāoa i whakairotia ai e Raharuhi Rukupo, he hoe i kohaina atu ai e Rongowhakaata ki a James Cook i te tau kotahi mano, whitu rau, whitu tekau mā iwa, me te papa patopato i whakamahia e Witi Ihimaera ki te tuhi i te pukapuka Pounamu, Pounamu.
Copyright © 2017, UMA Broadcasting Ltd: www.waateanews.com