September 24, 2018
Renata Blair Poari Whakahaere i a Eden Park
Renata Blair Poari Whakahaere i a Eden Park
Kua whakaūngia a Renata Blair o Ngāti Whātua Ōrākei ki te Poari Whakahaere i a Eden Park. Hei tā te Minita i ngā Take Hākinakina a Grant Robertson, he mea kopou a Blair e ia ki taua Poari, na te mea, he pūkenga ōna, he mōhiotanga ōna hei āwhina i taua Poari i roto i āna whakatau nui. He pakihi tā Blair, ko Strategic Pathways Ltd, te ingoa. Ko te mahi a taua pakihi, he whakahaere hui nui.
Tokomaha e tautoko ana i te kaupapa a Greenpeace
Hei tā te tāhūhu rangapū o Greenpeace a Russel Norman, he mea nui tana tukutanga atu i te kooti me te kore hāmene mo te poroteihi ki te taenga mai o te Amazon Warrior ki konei. Nō tērā tau, ka kauhoe atu a Norman rāua ko Sara Howell o te Roopu Kākāriki ki mua i taua kaipuke i waho i a Ahuriri, kia kore ai taua kaipuke e āhei ki te mahi i tāna mahi taunaha hinu i taua wā. Hei tā Norman, tokomaha ngā tāngata e tautoko ana i te kaupapa a Greenpeace, kia mutu tā tātou whakamahi i ngā rawa a Papatūānuku, kei pau mo ake tonu atu.
Pūtea mo te hunga i panaia i o rātou whare
E kore te nuinga o ngā tāngata waru rau i panaia i o rātou whare pāpori i te wā i whakamātautauhia ai aua whare mō te taimiri i roto i ngā pātū, e whai i te utu pāremata e whakaratohia nei e te Kāwanatanga. Koirā tā Alan Johnson o te Ope Whakaora. Hei tā te Minita i ngā Take Whare, nō te Kāwanatanga o mua te hē, engari, mā te Kāwanatanga o te wā e whakatika, a, ka tuku pūtea pāremata ki te hunga i panaia i aua whare hei whakaea i te pūtea i pau i a rātou ki te kawe i o rātou taputapu ki waahi kē, ki te kimi whare anō hoki. Heoi, hei tā Alan Johnson, kaore e kore, kua ngaro i aua tāngata rā ngā rēhita mō ngā nama i pau i a rātou ki te nuku whare.
Tohea ana ngā whenua o Tāmaki
E wawata ana te māngai torangapū mō Tāmaki Makaurau a Peeni Henare, ka tau te puehu e pā ana ki ngā tono raupatu i roto o Tāmaki Makaurau, i te whakatau a te Kooti Ikeike kia hoki atu ngā iwi e kōkiri ana i ēnei tono, ki te kooti teitei ki te whiriwhiri anō i te āhua o ngā whenua e kokorahotia ana e rātou, arā, mēnā rā e noho kē ana aua whenua ki te rohe o ētahi atu iwi. Hei tā te Kāhui o Marutūahu, ko tā tēnei whakatau a te kooti, he whakawātea i te huarahi e tutuki ai tā rātou tono raupatu, heoi, hei tā Ngāti Whātua Ōrākei, e wātea ana rātou ki te tohe mō o rātou tika ki ngā whenua o Tāmaki. Hei tā Henare, mai rā anō ngā whenua o Tāmaki e tohea ana.
Te whakataunga tiriti a Ngāti Maniapoto
Kua kii atu te Karauna, e kore e taea e rātou te whakatutuki i te whakataunga TOW a Ngāti Maniapoto i tēnei tau. Hei tā te toihau o te Rūnanga o Ngāti Maniapoto a Tiwha Bell, i tōna tikanga kia whakatutukihia te whakataunga a te marama o Hakihea, engari, kua ara ake ētahi kaupapa uaua hei whiriwhiri anō mā rātou. Hei tāna, ka waitohua te whakataunga nei a te timatanga o te tau rua mano tekau mā iwa inaianei.
Ngā kirihou ki roto i tō tātou taiao
Kua kiia atu ngā kaitorangapū o te Whare Pāremata, he raru nui te horapa haeretanga o ngā kirihou ki roto i tō tātou taiao, a, ko ngā manu o te moana ētahi e tino mate ana i tēnei tū āhuatanga. I takatū ake te roopu Ngahere Manu ki mua i te aroaro o te Komiti Whiriwhiri Taiao o te whare pāremata i ngā rā tata nei. Hei tā tō rātou māngai a Karen Baird, e pōhēhē ana ngā manu moana nei, he kai kei roto i ngā kirihou, mea rawa ake, ka raoa, ka mate. Hei tāna, ko ētahi o ngā manu nei, pēnei i te Tītī me te Oi, kei konei anake e paopao hēki ana.
Copyright © 2018, UMA Broadcasting Ltd: www.waateanews.com