October 08, 2018
Marlon Williams Tohu Silver Scroll
Marlon Williams Tohu Silver Scroll
Kua whakawhiwhia te uri o Ngāi Tahu a Marlon Williams ki te tohu Silver Scroll mo tana waiata Nobody Gets What They Want Anymore. Koinei te tohu nui mo te kaitito waiata toa o te tau. I whakawhiwhia a Ria Hall, Tiki Taane me Te Ori Paki ki te tohu Maioha mō tā rātou waiata i titoa rā e rātou, ko Te Ahi Kai Pō, te ingoa. he waiata e pā ana ki te hītori o te hapū o Hall i roto o Tauranga me ngā whenua i raupatuhia i a rātou.
Whakahoutanga i te ture tūao
E tōmina ana te Minita i ngā take Tūao, a Peeni Henare, kia whai waahi te iwi Māori ki ngā kōrero mō te whakahoutanga i te ture tūao. Hei tā Henare, kaore e kore ka pā te whakahoutanga nei ki te Māori, inā rā hoki, ngā iwi Māori e mahi ana i roto i te rāngai tūao, pēnei i ngā iwi kua oti kē i a rātou ā rātou tono raupatu te whakatau. E ono piriona tāra te uara o te rāngai tūao, engari, kaore ngā mātāpono o te iwi Māori i te tino kitea, i te tino whāia i roto i taua rāngai.
Aronui a Whaitiri ki te mahi mō Te Ikaroa Rawhiti
Hei tā te māngai torangapū i panāia i āna tūranga minita, a Meka Whaitiri, kei te aronui ia ki te mahi mā ngā tāngata o tāna rohe pooti o Te Ikaroa Rāwhiti, kei te aronui hoki ki te whakatika ake i te āhua o tana tiaki i āna kaimahi. E mihi ana ia ki ngā kōrero mōna i roto i te pūrongo e pā ana ki tāna tute kaimahi i Tūranga i ngā marama nei, i ngaro ai i a ia ana tūranga minita. Hei tā te pūrongo, te āhua nei, na te kapo a Whaitiri i te ringa o tana hekeretari, ka marū te ringa o taua hekeretari rā. Hei tā Whaitiri, kei te matangurunguru ia ki a ia ano.
Te Wiki Mate Hinengaro
Ko te Waka ama, māra kai, te whakakori tinana i raro i ngā whakaritenga Māori, te tuku kōrero mō te oranga o te whānau. Koirā ētahi o ngā pou o te wiki mate hinengaro ka tū hei tēnei wiki nei. Kua whakakotahi te roopu Hāpai Te Hauora me te Tūāpapa Mate Hinengaro o te motu ki te whakatairanga i te wiki nei. Hei tā Janelle Dymus o Hāpai, koinei pou nei ētahi o ngā āhuatanga rongoā hei patu i te mate hinengaro. Ka whakahaere kaupapa motuhake rātou ki roto o Tauranga, Kaikohe, Kawakawa me Kaitaia i te roanga o te wiki.
Copyright © 2018, UMA Broadcasting Ltd: www.waateanews.com